Tertulia: El sindicalismu del sieglu XXI

Resumen de la tertulia del xueves 5 de payares de 2009

El sindicalismu del sieglu XXI


Participaron

Juan Manuel Martínez Morala
militante históricu del sindicalismu Naval Xixón (CSI)

José Luis Llera
secretariu xeneral de la Unión Comarcal de Xixón d’USO

Presentó Daniel Fernández



Daniel Fernández
Vamos empezar cola tertulia Pachín de Melás, El sindicalismu nel sieglu XXI, pa la que tenemos invitaos a Morala, militante históricu del sindicalismu de Xixón, vinculáu al sector naval y a José Luis Llera, que ye´l secretariu xeneral de USO en Xixón.
Teníamos tamién convidada a Beatriz Quirós, vocera de SUATEA, pero’l tema la carrera profesional, que ta movilizando a los sindicatos estos díes, impidió la so presencia.
Como ye sabío, esto ye abierto, y creo que lo meyor va ser qu’entamemos con una pequeña esposición de lo qu’entendéis que ye o tien que ser el sindicalismu del sieglu nel que tamos, el sieglu XXI.

Juan Manuel Martínez Morala
Voi empezar diciendo que soi mui negativu. Mantengo la teoría de que nun hai sindicatos nesti pais.

Un asistente
Vaya, entamamos fuerte



Juan Manuel Martínez Morala
Fixaivos que nel primeru de mayu en Francia, los sindicatos sacaron a la cai un millón de trabayadores. En Madrid, esti añu les meyores informaciones dan quince mil, y tamos falando de Madrid qu’hai cuatro o cinco millones d’habitantes, y munchísimos son trabayadores.
Por tanto esto ye lo que digo de los sindicatos.

Bono, la CSI nun ye’l sindicatu de la clas trabayadora. Nun lo ye. Ta más claro que l’agua. Nós somos un colectivu de trabayadores que nos xuntamos pa poder defendenos porque nos echaron de Comisiones Obreres, y de momentu tamos ehí. Somos un sindicatu con menos afiliación qu’USO con un cachu.
Pero nosotros, aquelles crítiques que facíamos dientro Comisiones Obreres, onde planteábamos que queríemos facer un sindicatu non ancláu na vindicación nel centru de trabayu. Porque’l trabayador, cuando sal de la empresa, tien fíos qu’estudien, tien problemes nel barriu. Porque por exemplu-y ponen una regasificadora o unos depósitos al llau como los de Xove…

El sindicalismu nun ye pa perseguir dos pesetes más o una meyora social más. Yo creo que’l sindicalismu güei tien que tar rellacionáu colos movimientos sociales. Y que nosotros intentamos practicar. Ye decir, intentamos apoyar a la zona rural, o tar colo de la regasificadora, o les redes d’alta tensión. Tamos na plataforma contra la represión y poles llibertaes. Si convoquen los del muro de Cabueñes na Plaza Mayor, ellí tamos, o si se convoca una manifestación pa que s’esclarezca la muerte de David Blanco, porque, aunque sea un delincuente, tien derechos, porque mañana, a cualquier persona detienenla y pasa-y cualquier cosa y déxenla morrer en comisaría. Polo que pedir que s’esclarezan los fechos ye lo más normal del mundu.

Cuando los primeros movimientos anti esta globalización en Seattle, precisamente diéronse fuertes movilizaciones porque eso foi una conxunción de los movimientos sociales colos movimientos sindicales.
A nosotros paeznos que’l sindicalismu del sieglu XXI, tendría que dir enfocáu un poco a eso, a parte del problema na empresa. Incluso los problemes de les empreses tampoco son esclusivos de los trabayadores. El desmantelamientu d’un sector industrial o d’una actividá…

Por exemplu, pensamos que sería bono nesta situación de crisis, antes de que la cosa vaya a peor, paeznos fundamental el tema de la recuperación del campu asturianu.
Vemos a los ganadenos de Cangas del Narcea que tán un poco fuera d’ASAJA o d’UCA o de COAG, tuvimos con ellos, debatimos, ye decir, rellacionamos el sindicalismu colos movimientos ciudadanos, sociales y demás.

Y viceversa, como agora, cuando intentaron que pagáramos la multa o sinón pa la cárcel a Cándido y a min. A les concentraciones venía xente tamién de la zona rural, porque los sofitáremos enantes coles marches verdes contra la especulación urbanística.
Porque yo creo qu’equí, esto que llamen democracia, nun lo ye, y dizlo cada vez más xente.

Y nos Campos Elíseos, los campesinos, hai una selmana o dos quemen cereales y lo que sea, y ta ellí la policía antidisturbios y nun pasó nada, y equí, na Castellana trátente de terrorista p’arriba. Equí enseguida ye un atentáu, si uses petardos, acusen d’artefactos esplosivos. O seya’l terrorismu ye una bona pantalla pa encubrir la falta llibertaes.
Porque amás equí la policía tien un manual. Equí la policía pégate una panadera porque protestes, y tienes que pensar que te va a acusar de que los insultaste y-yos pegaste pa cubrise de la panadera que te pegaron. Ye lo qu’ocurre equí, como nes dictadures.

A Cañamero y a los diez que detuvieron l’otru día n’Andalucía porque pedíen trabayu, queríen un empleu, ya veis qué delitu, pegáron-yos una panadera de la virxen y encima acúsenlos d’atentáu. Vamos que la llei antiterrorista yera pal norte pero aplíquenla a los trabayadores, ye pal pueblu. Como la época Franco, aquí, mientras nun te muevas nun pasa nada, pero tate nel redil. Los ayuntamientos y les alministraciones pa eso tienen a la policía. Lo que pasa siempre, una empresa despide a cien obreros y nun pasa nada, pero si esos cien obreros quemen unos neumáticos… a onde vamos a parar…, quemaron unos neumáticos…la de mi madre.

Nun sé si ye frutu de los años que pasamos de la dictadura, o de la ruptura xeneracional o lo que seya, pero cuando los alemanes faen una güelga xeneral, ya me prestaría a mí que munchos trabayadores españoles tuvieren ellí, pa que vean cómo les gasten los trabayadores. Bueno equí vamos toos pa la cárcel.
Equí paecemos toos monxines de la caridá, y la CSI, que ye un sindicatu, si quemes cuatro neumáticos, que si terroristes, que si kale borroka, que si jarrai…. Esto ye un déficit democráticu de la hostia.

Con esto termino. Yo creo que nesti país nun tenemos sindicatos, ye decir, la hexemonía de Comisiones y UGT ye manifiesta, tán sovencionaos pola patronal y pol gobienu. Y la independencia ideolóxica y la independencia sindical dala la independencia económica, polo que nun la hai.
Recuerdo que cuando gobernó Marqués una temporada y retrasó a los sindicatos el pagu de les sovenciones casi se-y tiren al pescuezu. Entós el que paga manda.
A nosotros nunca nos da sovenciones l’alministración porque como nun firmamos, y encima echamos abaxo lo que firmaron los demás, pues nada, nin un duru.

Y bueno, cada sindicatu y cada partíu tien un policía, como mínimu, tan infiltraos, y cuando fue’l xuiciu de Cándido y míu, va y declara un policía contra nosotros, y resulta que ye ún que vino a Barcelona con nosotros y amás taba rompiendo cristales. Cuando vas nel autocar siempre hai alguien que fai una foto, y resulta que tenemos fotos con él. Y diz que nun nos conoz de nada, que ye la primer vez que nos ve. Y cuando lo denunciamos al xuez, diz que non, qu’eso yá prescribió. Esto ye un cachondeo.

Agora que mientres seas bonu, vayas pel redil, digas, ¡oye!, nun seas malu, nun despidas a cien, despide a cincuenta, aunque él pensaba despedir a cuarenta, ya ta. Ye un sindicalismu de pachanga.
Tenemos una patronal que ye pa echar a correr. Yá vemos lo que pasó col ladrillu, que lo vamos pagar mui caro. Y la crisis va empezar a vese agora. Porque les indemnizaciones, les prestaciones pol desempléu van a empezar a acabase agora.

Por eso teníamos que recuperar el campu, hai qu’asegurar a la xente la soberanía alimentaria, una reivindicación necesaria a nivel global. Los franceses yá lo tán faciendo, los americanos tamién, los chinos, los coreanos… si n’Asturies, que tenemos vaques, ecolóxiques, que tán sueltes pol campu, fabes, maiz, piesca, de too, y bono, si vien una crisis y nun tienes móviles val, pero si tienes un buen quesu, una bona sidra, un vasu llechi, unes castañes, hostia, ríeste de la crisis.

Equí entendemos que los sindicatos nun tamos faciendo ningún papel, y tán desmantelando’l campu.
L’otru día molíen a palos a los payeses de Cataluña, pero como se defendieron, yá tán acusaos d’atentáu. Y eso los payeses, que son medio patronos.


José Luis Llera
Bueno, yo nun tengo la oratoria de Morala, voi ser bastante más cortín pa dinamizar un poco la tertulia.
Comparto muncho de lo que dices, compártolo al cien por cien. Comparto que los sindicatos debemos abrazar los movimientos sociales, tenemos que tar presentes.

Pero yo sí creo nos sindicatos, creo que tienen que pervivir nesti sieglu XXI.
P’afondar nel tema, creo que la culpa de lo que tas diciendo ye de los dirixentes, que ficieron munchu dañu nesti pais.

Creo tamién que los sindicatos tamos burocratizándonos munchísimu, tamos desapegándonos de la realidá, del tayu, de la cai. Yá nun ye lo qu’había antes. Tendemos a un tipu de sindicalismu fácil que da muncha cañada, pero que lo que favorez ye que se firmen coses que acaben siendo atropeyos pa los trabayadores.

Y tenemos que recuperar los valores esenciales. El tema de la solidaridá prácticamente ta desapareciendo, sabéislo bien, porque nun se trata de mendigar, trátase de compartir, de tar ehí, de dar la cara nel momentu en que se necesite pol compañeru, pol vecín.

Daniel Fernández
Una de les cuestiones que quería abrir y saber la vuestra opinión, ye la crítica al sistema sindical. Los delegaos, les elecciones sindicales nes que voten poquísimos trabayadores…
En tolo que nun seyan grandes empreses nun se ta teniendo ninguna repercusión. A lo meyor en ciertos sectores, pero como escepción.
Y tamién empieza haber una crítica mui fuerte, sobre too ente la xente más moza, a lo que ye’l lliberáu sindical.
¿Creeis qu’hai alguna posibilidá de plantear un modelu sindical, institucional, un poco diferente? Bueno, evidentemente Comisiones y UGT nun van entrar por ehí, pero ¿hai alguna posibilidá? Y ¿esi cambiu sería buenu?



Juan Manuel Martínez Morala
Vamos ver, el 80% de la clase trabayadora ta na pequeña y mediana empresa. Y muncha clase trabayadora ye autónoma.
Sin embargu nes empreses onde se reparten los delegaos sindicales vota muncha xente, llegamos a porcentaxes mui altos, del noventa y tantos por cientu.
Ye decir, voten n’Hunosa y voten el 98%, y el que nun vota, van a buscalu. Ye un sistema mui clientelar nestos sitios.
El desprestixu que tenemos los sindicatos, porque nun hai peor cosa que nun oyer la cai, ye morrocotudu. Ye peor incluso que’l de los partíos políticos. Y eso colo que ta cayendo agora mesmo cola corrupción. Que da lo mesmo que seya’l PSOE, que seya’l PP o el Partíu Aragonés Rexonalista. Ye qu’equí ta pilláu tol mundu.
Corrupción surde na Corriente y en tolos llaos. El problema ta que contra la corrupción nun se tán tomando medíes.

Por exemplu, equí nel Ayuntamientu de Xixón, lo de Cabueñes, lo de Ovidio Blanco, si nun lo descubren los vecinos nadie s’entera de nada. L’Ayuntamientu nun sabe nada. Los que tienen los medios pa vixilar la corrupción nun faen nada. Tienen que ser los vecinos.

O cuando güei poníen unes grabaciones de lo que pasó en Santa Coloma, un vecín decía, “oye, lo que tais faciendo ye corrupción”, y contésta-y cachondeándose’l que ta agora na cárcel, “mire usté nel diccionariu lo que ye corrupción y lo que ye especulación”.
Ye seguro qu’hai tiempu que los vecinos taben denunciándolo pero’l restu de la corporación del PSOE nun sabía nada. ¿Cómo ye esto?

Nesti pais tenemos la cultura de que’l que nun roba nun ye honráu, ye tontu.
Tu mires y, Trevín, negocios, Areces, negocios en Panamá. Ves que tán toos nos sos negocios.
En consecuencia la política nun pais como ésti ye la del pillaje.

Pues los sindicatos igual. El desprestixu que tenemos na cai. La falta de soluciones a la xente. Los lliberaos.
Alcuérdome que en UGT, en constructora mesmo, acusaben a Donaire que taba na patronal y vivía como los patronos más que colos obreros.
Hai ya una casta sindical equí metida que nun se va quitar asina como asina. Gánase y vívese mui bien. Yo creo que hai sindicalistes que viven meyor que los patronos. Nun ye broma. Porque hai patronos que tienen qu’aguantar pola empresa y tienen bien de quebraderos de cabeza.

Romper eso va ser mui difícil. Y amás si los dirixentes sindicales nun dan exemplu, la corrupción va baxando cada dez más. Va baxando a los comités d’empresa. Y llega un momentu en que nin los propios sindicatos controlen al comité d’empresa.

Hai munches regulaciones d’empleo agora onde la xente ta trabayando los díes de regulación.

Ta instalándose una corrupción a tolos niveles. Ayuntamientos, sindicatos, partíos, instituciones, empreses como Recrea, La Laboral, esto, lo otro, ¿nun vos dais cuenta la tela d’araña que ta fecha?
Y el mundu sindical, yera’l que tenía que denunciar la corrupción, pero ehí ta instalada tamién la corrupción.

Un asistente
Y qué decís sobre la figura del delegáu sindical lliberáu.

Juan Manuel Martínez Morala
Al tar lliberáu, ta engancháu.

El mesmu asistente
Yá, por eso una propuesta sindical potente taría que se prohibieren los delegaos sindicales lliberaos.



José Luis Llera
Pero date cuenta qu’hai sindicatos que subsisten gracies a eso. Y yá nun falamos de los grandes sindicatos.


Juan Manuel Martínez Morala
Nosotros nun tamos d’alcuerdu colos lliberaos. El nuestru secretariu xeneral ta trabayando en Monroe.
Nun nos gusten los lliberaos en primer llugar porque nun hai ningún control dende la base, y llega un momentu en que´l lliberau pierde’l contautu colos trabayadores. Ta más tiempu cola empresa que colos trabayadores.

Mira lo que nos pasó a nosotros con Churruca, conceyal del ayuntamientu de Xixón. ¡Si tuvo quemando neumáticos conmigo en Naval Xixón!. Y rompió la mesma cámara que nos acusen que rompimos nosotros. Porque nosotros, yá lo diximos munchísimes veces, fuimos los que la rompimos, aunque nun lo ficiéramos individual y materialmente. Por eso siempre falamos en plural. Fuimos los trabayadores del sector naval.


Otru asistente
Pero pregunto respeuto a los lliberaos, ¿nun puede llegar un momentu en que, pa los sindicatos, por dimensión o por necesidá pudieren llegar a facer falta?
Ye decir, ¿hai que quitar a la figura del lliberáu de por sí, o polo que puede llegar a convertise?
Ye como decir, los políticos son unos corruptos. Entós ¿qué eliminamos?¿a los políticos? O habrá maneres de ser políticos o habrá maneres de ser lliberáu sindical.


José Luis Llera
Bueno, yo creo qu’hai de too. Conozco lliberaos que son honraos.


Juan Manuel Martínez Morala
Pero nun ye cuestión d’honradez. Yo tenía cuarenta hores pa facer sindicalismu al mes, y sobra. Agora que si te conviertes nun profesional…
Vamos ver, si un secretariu xeneral ta lliberáu cuatro años, y otros cuatro años, y otros cuatro años, y otros cuatro años. Eso nun pue ser.
Yo tuve cuatro años de secretariu xeneral, Cándido tuvo otros cuatro, agora ta Samuel otros cuatro años y déxalo. Porque ye peor el perxuiciu que causa la lliberación, y la rutina, y la falta d’interés.

Cuando se vota la constitución europea, los sindicatos franceses, como la lleeron, dixeron que non. L´únicu pais que votó en referendun sí fue l’estáu español, colos sindicatos, nun vos olvidéis. Pero´l secretariu xeneral de la CXT francesa y cinco más de la executiva dixeron que sí, pero lleváronlo al conseyu, que son ochenta y votaron setenta y picu que non. Y tuvieron que facer campaña pol non. Y salió en Francia non, como en Bélxica o Holanda, non.
Y como salió’l non nun se fizo más. Somos el number one de la democracia. Como la xente diz que non, nun se faen más referendums.
España fue l’únicu sitiu onde se fizo referendum y dixo sí. El resto de los que ficieron referendum dixeron que non, incluído Irlanda. Que llueu ya ves Irlanda, como dixenon que non una vez, volvieron a facelo, hasta que digan sí. Eso ye la democracia qu’hai.


Daniel Fernández
Y nun crees que ye necesario que, a partir de ciertu nivel, ye necesario llegar a un grau de profesionalización y de capacidá técnica del propiu negociador. Quieras o nun un sindicalismu duru y fuerte tien que sentase nuna mesa de negociación a falar de temes técnicamente complicaos, y eso ye difícil facelo si nun tienes profesionales.

Por eso nun digo de mano non al lliberáu, sinón pregunto si nun habrá una nueva forma d’entendélo, porque sí, agora la separación coles bases ye brutal, pero ye necesario un grau de profesionalización pa debatir ciertes coses.

Conxugar eses dos coses ye la clave. Y ye mui complicao. Porque ye verdá que lo de los mayoritarios ye aberrante, porque amás tampoco ye que tengan unos líderes brillantes, pero fales de los sindicatos alemanes, y a la hora de negociar, lleven unos técnicos, que por cierto, nun son lliberaos, sinón contrataos, nun modelu distintu al que tenemos equí, que requier unos recursos económicos y una profesionalización.


José Luis Llera
Yá pero ¿cuántos tán equí afiliaos?. Un diez por cientu siendo xenerosos.
Mira n’Alemaña la IG Metall sólo, cuántos tien. Tien más que tolos del Estáu Español xuntos. En Bélxica tan afiliaos el setenta por cientu.
Ye la cultura sindical. En Bélxica, los fondos d’empléu y d’alministración del paru llévenlo los sindicatos.


Juan Manuel Martínez Morala
En Bélxica tienen una cosa que ye como’l paru indefiníu. Y equí échente d’una empresa y tienes dos años de paru. Llueu cobres el subsidiu y nun hai más. Suponte que nun yes ni mui xoven nin mayor, unos 35 años. O robes o lo que seya.
Y los sindicatos qué. ¿Qué faemos?



Un asistente
Y¿qué culpa tien el trabayador?
En toa esta estructura, na que sólo hai un diez por cientu d’afiliaos, y el prestixu que tienen los sindicatos…

Hai un anunciu de legálitas que diz algo como que “en mi empresa han despedido a varios compañeros, yo por si acaso…”, yo quedé alucináu. Sal un xefe diciendo, “a las cinco en mi despacho” y empieza a pensar esi empleáu “si m’echen ¿podré cobrar nun sé qué? Y si toi embarazada ¿podrán echame?” y dizse “apúntate a legálitas, que te defenderá”. Ta claro lo que se trasmite, que la ferramienta sindical nun val pa eso, cuando tendría que servir.

Y el grau de precariedá nel que ta un trabayador agora mesmo... Sobre too trabayando en pyme. El riesgu de revolvete si trabayes nuna empresa de diez.


Juan Manuel Martínez Morala
Tas olvidando creo que lo fundamental. Pa evitar esa debilidá del trabayador nuna empresa de cinco persones tenía qu’haber un sindicatu.
Yo recuerdo hai munchos años, yá nel añu 75 o 78, cuando yá tol mundu yera demócrata y la xente salía a la cai, que facíamos el conveniu colos pequeños talleres. Baxábamos de los polígonos en riaes de manifestaciones. Y si nun polígonu, una empresa despedía a un trabayador, convocábase concentración en tol polígonu y había la de dios.
Entos el problema ye’l sindicatu. Nun ye’l trabayador nin la empresa.

Equí, nel Estáu Español, con cuatro millones ciento veintitres mil paraos según la encuesta de población activa, que seguro que ta manipulada, nun hai nada, nun ta pasando nada. Y eso yera p’armar la de dios, qu’hai xente que nun tien pa comer.
¡Que los sindicatos nun temos pegando un puñetazu enriba la mesa cola situación tan jodida que tenemos!. ¡Qu’esto fúndese!.

Güei decíen nun chiste “vamos ser los últimos en salir” y contestaben “bueno, si somos los últimos ya me conformaría, pero ¿vamos salir?”.
Equí tamos toos empufaos, empreses, families... Con cuatro millones y picu de paraos, con ocho millones de pensionistes, con un porrón de funcionarios. Equí nun tenemos nada.

Y fíxate tu que clase de sindicatos tenemos que, cuando ta desmantelándose too, cuando tamos yendo a la ruina, tamos toos mirando pal sol.
¿Onde tán los sindicatos?



José Luis Llera
Los sindicatos nun son una cosa abstracta. Los sindicatos son trabayadores, persones. Ye verdá que nosotros métemonos ehí tamién, pero los que proyecten son Comisiones y UGT, que ye lo que cala na sociedá.

Y vuelvo a repetir qu’a los sindicatos fálta-yos cultura. Ye l’autocrítica que fago. Tenemos qu’implicanos muncho más y facer porque se vean coses básiques. Involucrános más.
Un sindicatu nun ye legálitas, ye algo más.


Una asistente
Nun tien porque ser eso, pero yo creo que si la xente va a un sindicatu ye porque tien un sitiu a onde dir a plantear esi tipu de problemes concretos y de trabayu. Y amás tienes un abogáu gratis que ye´l del sindicatu. Y afílieste a los grandes, que son los que pueden ayudar algo, si ye que pueden, porque son los que tienen esa red clientelar de la que falábais antes.
Y mientres esa percepción de la xente nun cambie nun se va xubir del diez por cientu que falábamos.

Juan Manuel Martínez Morala
Vamos poner l’últimu casu de Cándido y miu, que ye actual. Pídenos el xuez que-y pagemos al Ayuntamientu 5.634 euros. Yo podría coyer al abogáu y deci-y, oye, recúrrelo. Pero nun tien recursu, ye un, bueno, vamos llamalo indultu, o lu cueyes o nun lu cueyes. Pero la respuesta d’un sindicatu, como en Francia y Alemaña, ye sacar a la xente a la cai. Si nun presiones nun te tienen mieu.

A abogaos van ganate ellos, porque capital tienen, tienen más posibilidaes de contratar a meyores abogaos que tu. Traer a los grandes bufetes, esos que tienen compraos a xueces y demás. Ehí nun tienes nada que facer.

Entós vas ehí, a la plaza l’Ayuntamientu, aunque sólo seya pa facer un puquiñín de protesta.
Yo nun digo que s’asustaran porque fueres a dar vueltes a la Plaza Mayor, pero lo meyor ye nun tene-yos mieu.
Nun vamos pagar y vamos pa la cárcel.
Y va un tío, que se llama Gil Alberto Pérez Carneado, miembru de la executiva rexonal del PSOE y paga na oficina de Banesto.
Bueno, yo nun sé si fue poles vueltes al Ayuntamientu o pola que se podía armar si vamos a prisión, pero al abogau nada. O te plantes na cai y faes visible’l descontentu y la protesta o nun faes nada.

Y eso ye lo que los sindicatos nun faen. Esi ye’l problema.
Vamos, sacamos a cien mil persones a la cai y pónense a temblar.


José Luis Llera
Toi complétamente d’alcuerdu contigo, pero lo que se ve ye que la xente que fala d’afiliase a un sindicatu busquen asesoramientu. Nun busquen la solidaridá ente otres coses porque nun tan dimpuestos tampoco a dala.

Juan Manuel Martínez Morala
Pero los sindicatos tenemos que convocar.

José Luis Llera
Eso sí. Tenemos que dir un pasín per delantre. Pero la xente ta mui desmotivada.

Un asistente
Y además, si nun hai transmisión política na Xunta Xeneral o nel Conceyu de Xixón, creo que l’actividá sindical queda coxa. Históricamente l’actividá sindical viose como una correa de tresmisión a una actividá política, tanto del partíu al que ta ún venceyáu como a otru que casualmente venceyóse puntualmente a tal o cual reivindicación. Pero si nun l’hai ye cuando por muncha actividá sindical qu’haya, si dempués eso nun yes capaz de traducilo tamién en presión política, fálta-y una pata’l bancu.


Juan Manuel Martínez Morala
Vamos ver, nosotros tamos relacionaos un poco colo poco se se mueve, colos ciudadanos, que normalmente nun son los partíos, sinón los ciudadanos los que tán resistiendo, eso ye una cosa que tenemos tamién que planteanos. Pero falando de sindicalismu, qué duda cabe que nun sólo había que rexenerar el sindicalismu, sinón la política.

Entendei que lo mesmo que tamos diciendo que’l desprestixu de los sindicatos ye xeneral, la confianza de los ciudadanos nos partíos políticos ye ninguna.

Entós tas colos de la zona rural, tas colos de Cabueñes, tas colos de la ZALIA, tas colos de la regasificadora, tas colos de Xove que-yos quieren poner aquellos depósitos allí al llau, tas colos de les redes d’alta tensión...

Por exemplu nun ye normal que nosotros, como sindicatu, cuando detienen a los d’Aller de la rede d’alta tensión, vengan a la CSI. Porque lo normal yera que vinieren si los hubieren despidío de la empresa, pero non si los detién la policía.
Alcuérdome que Marisol, cuando los deteníos de cuando’l xaréu de les torres aquelles, vino con ellos a venos hasta Xixón. ¿Ye que nun tienen ningún grupu’n Mieres? Nun se fiaron.
Y así ta pasándonos con munchísima xente.

Entos, sí que tamos viendo que hai coses que tamos faciendo dende’l sindicatu que nun nos corresponden, corresponden más bien a grupos políticos o a otros movimientos ciudadanos. Pero nun hai alternativa política pa la xente.

. . .

Cuando lo de meténos a Cándido y a mí a la cárcel.
Si por defender los intereses de los trabayadores intenten metete na cárcel, escápeste un poco de la corrupción, de la falta de confianza de la xente. Ellos llegaron al convencimientu de que nosotros queríamos dir a la cárcel, y dixeron, ¡nun lo podemos consentir! vamos pagar.
Agora, si-yos tienes miéu, pues nada, que paguen, y amás que sirvan d’escarmientu.

¿Sabéis lo que supón pa un ayuntamientu del PSOE y Izquierda Unida tener que doblar y pagar? ¿Qué fue, por cuatro que salieron a la Plaza Mayor? Non. Teníen miéu a más coses. A la movilización.

Pero al abogáu nun-y tienen miéu. Aunque ganes, siempre pierdes. Y si non mirai los de la plantona, mirai lo que va pasar col muru de Cabueñes. Como nun lo acompañen de presión, aunque seya poca. Ye a lo único que-yos tienen miéu. Ye a lo único.

Güei, con ser honráu, nun fai falta nin ser d’izquierdes, nin mui roxu, nin mui radical nin nada, con ser honráu yá ye muncho.
Porque’l que ye honráu diz, oye, nun me fagas comulgar con ruedes de molín, ho, qu’esto ye una estafa, qu’aquello ye un pelotazu, pero cómo vas poner una regasificadora ehí si dixo’l Director Xeneral d’Enerxía, que ye inclusu defensor de la enerxía atómica, que les regasificadores al llau de les ciudaes ye una barbaridá. Eso ye un insultu a la intelixencia. Nun fai falta ser d’izquierdes pa decir eso.


Un asistente
¿Entós qué tenemos que facer?


Juan Manuel Martínez Morala
Primero movilizáte tú, y llueu, ver si te sigue la xente. Ye lo que te queda. La xente de por sí, desorganizada y nun se pon na cai colos otros vecinos por telepatía.

José Luis Llera
Ya, pero la xente ta superdesmotivá. Tenemos l’exemplu claru de la Dupont, cómo tan sindicalmente, el Corte Inglés…
Ta claro que algo falla.


Daniel Fernández
Yo creo tamién que los sindicatos, y los partíos políticos, tán cayendo muncho n’utilizar lo mesmo que se diba faciendo dende mediaos del sieglu XX, manifestaciones, y tán faltando formes novedoses.

Pongo un exemplu, estudié en Santiago y ellí montamos una bastante guapa cuando la LOU. Un llunes montamos una fuelga de consumu. Diximos a la peña, que yeren gallegos casi toos y que normalmente marchaben pa casa y tornaben el llunes, que pillaran más comida en casa y el llunes nun fueran a comprar. Un día. Y el martes fueron a l’asamblea d’estudiantes los representantes de los comercios a ofrecenos perres pa la campaña anti-LOU, pero que nun se nos volviera a ocurrir facer eso.
Paez una tontería, pero sí que foi mui efectivo.

O seya, creo que teníemos que ver por variar l’acción colectiva. Buscar nueves formes. Porque, quieras o non, lo mesmo de siempre suena a vieyo.
La forma d’actuar de los sindicatos ye la mesma de siempre. Comisiones ya fai l’ún de mayu. UGT fai una fuelga de vez en cuando. Entos, si faes una manifestación, nun te suena a algo distinto a lo que faen Comisiones y UGT.


Juan Manuel Martínez Morala
Si mires p’atrás, pal sieglu pasáu, igual alcuentres coses de les que tas diciendo. Lo de negase a comer nos comedores…

Esta sociedá lo único que quier ye que los problemes nun se visualicen, que nadie salga a la cai na forma que quiera. Pero ca ún sal como puede, colos medios que puede.

Por exemplu Litoral, les güeles de Litoral, fízose d’otra manera. Díbamos a casa’l patronu a tocá-y les narices, yera lo que podíamos facer coles que yeren, y a la xente prestó-y. Pero lo que nun podíamos facer ye decir, bueno, defendémoste nel xuiciu, si sal Antón, bien, y si non quédeste na puta cai sin trabayu. Eso nun pué ser nun sindicatu. Eso nun pue ser.



José Luis Llera
Pero munches veces la xente pasa. Nun sal a la cai. Nun asumen la so condición de trabayador. Tán desclasaos. En dellos casos el trabayador tien culpa tamién. Tán, tamos, superacomodaos los trabayadores. A lo meyor ye un reflexu de la sociedá, que ye como ta.

Puedo ponete exemplos de colectivos que pa exercer una fuercia nun momentu dáu y nun llegar a la fuelga, nun llegar a una concentración o nun llegar a la cai, planteóse-yos nun facer hores estres, y nun lo llevaron a cabu. Y tamos falando d’un colectivu d’unos ciento veinte mil trabayadores.

Juan Manuel Martínez Morala
Otra de les coses del sindicalismu. Una diferencia que siempre vimos con Comisiones y UGT. Cuando hai un problema, siempre ye lo mesmo. Convoquen un día o dos de fuelga, xustificaron que ficieron algo y a negociar. Y si decíen mil doscientos, ellos novecientos y ya tá, que yera lo que quería en principiu l’empresariu, y ta tá too pactáo.

O como cuando la televisión llocal Xixón, un día vamos a la Plaza Mayor, decimos que qué malos son los patronos que nos quieren despedir y ya nos olvidamos. Y cerró. Primero echaron a unos pocos y llueu a toos. Non. Non.
Lo que val ye como la formiguina. Güei voi allí. Mañana voi a Vitorino Alonso, porque Vitorino Alonso yera´l dueñu.

Mira, volviendo a les de Litoral. Los martes concentrábense los trabayadores a la puerta. Los xueves les trabayadores despedíes mas xente d’otres empreses en solidaridá. Llueu cola charanga de les muyeres eses que toquen. Otru día fue la charanga Ventolín. Díbamos de culiebra repartiendo fueyes poles cais de Xixón. Y llueu a onde vivía’l patrón. Fueron a la sede central, a Barcelona. Metiéronse ellí, a la puerta, con pancartes, vestíes como la güela de la fabada Litoral. Y así. Y yera un día, y otru, y otru.

Y solucionóse’l problema, porque-yos ofrecieron el puestu de trabayu o una indemnización pa prexubilase, lo que queríen. Ofreciéron-yos lo que queríen. Una multinacional. La Nestlé.
Y xenérose además una solidaridá del restu l’Estáu, pero non de los sindicatos, sinon de los trabayadores.
Entós lo que val nun ye facer un día una manifestación. Sinon un día y otru día y otru.

¿Nun vos alcordais de los bomberos de Xixón, cuando durante tola campaña electoral diben a tolos actos col so silbatu. Y dieron-yos lo que pedíen.

Como ficimos nel naval l’otru día que subimos a les grúes. Empezamos y cuando té solucionao acabamos. Nun sé’l tiempu que voi tar equí arriba. Ye’l vuestru problema, lo qu’aguantéis. Nun somos nosotros los qu’aguantamos, sois vosotros. Que queréis detenenos, deteneinos. Que nos metéis pala cárcel, pa la cárcel. Nosotros a lo nuestro. Hasta’l final y pa casa.
Pero lo que nun val ye xubir un día, facer un corte tráficu y pa casa. Aguántenlo y acabóse.

Pero’l problema ye que los trabayadores nun se ven defendíos polos sindicatos. Y entós firmen lo que seya.
Equí los sindicatos, si cobres ochocientos, como si te paguen seiscientos. Como nun lo arregles tú, nun esperes que te lo arreglen los sindicatos.

Pero los sindicatos teníen que ser la fuerza. ¿Qué hai convenios equí con seiscientos euros? Eso acabóse. Vamos dir a fa fuelga y equí nadie por debaxo los mil euros. Y movélo nes cais, y esta selmana, y la que vien, y esti mes y al que se-y pille con menos de mil euros…
Eso ye una actitú sindical.

Pero si ún, individualmente, tien ochocientos euros, tranquilu, que igual nun-y lo baxen a seiscientos, porque como hai cuatro millones esperando a la cola y los sindicatos nun faen nada. Pagarán lo que quieran. Y nun eches la culpa a la xente ¿eh?

Daniel Fernández
Tengo una pregunta concreta si me permitís, que ye’l tema de la inmigración illegal. Cuál ye la respuesta sindical que tien qu’haber.
Yo creo qu’hai un error equí nos sindicatos, y esto ye una opinión personal, y toi falando de UGT y Comisiones, qu’amás, como vi n’una pegatina, tán usando’l mesmu eslogan que Democracia Nacional, “los españoles primero”.
Creo que lo qu’había de facer ye que a la persona que trabaye, seya llegal o illegal, nun se-y puede permitir al patrón que-y pague nunca menos que a ún d’equí.



Juan Manuel Martínez Morala
Visualícense meyor les coses con exemplos. Mira a nosotros traxéronnos una compañía de polacos a Naval Xixón y lo primero que ficimos fue decir, mui bien, a trabayar, pero col conveniu d’equí. Lo qu’esiximos fue qu’a igual trabayu, igual salariu. Por menos nun lo vamos consentir.

La inmigración ye otru de los problemes que cola crisis va traer bastantes consecuencies.
Esta crisis de la que tamos falando nun ye una crisis sólo económica. Ye ecolóxica, ye crisis alimentaria. Tamos acabando coles materies primes. Ye una crisis de la basura, somos too basura. La crisis ye global.

Tán morriendo de fame más de mil cien millones.
Y la solución nun ye la inmigración.
Son cuatro millones y mediu d’inmigrantes, casi podíamos decir que cinco o más na práctica.
Abres equí les puertes y sería abrir les puertes al fascismu.

Tenemos qu’esixir nel primer mundu que los del tercer mundu tengan derechu a comer, y entós yá nun vendríen.
Y una vez qu’un inmigrante tea equí, tienes que tratálu como otru cualquiera.

Pero si nos sumamos a les campañes de la derechona… -son los patronos los que los traen equí pa esplotalos y pa combatir les reivindicaciones de los autóctonos- podríemos decir que ya la fastidiamos.


Un asistente
Hai una pintada xigante en Promosa que trae “Inmigrante trabajando, español en paro”.
Una ecuación mui cenciella. Ye demagóxico pero funciona mui bien. Y ye un discursu mui peligrosu’l que se ta xenerando, porque ye caldu de cultivu pa xenerar una especie de concencia sindical de derecha fascista.
Le Pen tuvo munchu votu de trabayadores.


Juan Manuel Martínez Morala
Pero esi discursu nun val. La única solución pal problema del inmigrante ye la mesma que la otra. O los sindicatos faen dalgo y ponen freno a la crisis, o sinón l’ecu que va a haber va ser el de Le Pen, lo que dices, “inmigrante trabajando, español en paro”.
Y tamos favoreciendo l’integrismu español ranciu y recalcitrante.
Vamos siempre al mesmu problema, cuando los sindicatos nun dan soluciones, danles políticos como éstos.


Daniel Fernández
Y la otra pregunta que quería facer ye sobre la situación de les muyeres nel sindicalismu. Creo que, como n’otros sectores, les muyeres son les grandes olvidaes del sindicalismu. Y nun hai más que ver que los sectores mayormente femeninos tán munchísimo peor que los masculinos.
Y por embargu, n’Asturies, demostraron, por exemplu n’IKE, que cuando se ponen, tienen una capacidá sindical y de llucha casi superior a la de los homes, que se supón que tán más integraos en sindicatos y tienen más tradición.


José Luis Llera
Téngolo claro nesi sentíu. Nos sindicatos predicamos na medida que podemos col exemplu. Pero nun sé si porque acceden d’otra forma al mercáu de trabayu, o porque fálta-yos tovía cultura sindical, cuésta-yos muncho más y acceden pocu a cargos dirixentes y miembros de comité.

Juan Manuel Martínez Morala
Yo desearía que nun accedieran muncho a esos cargos de dirección, porque pa facer esa dirección val más que non.

Ye que si nun somos conscientes que nun tenemos sindicatos, nun vamos cambialo. La clase trabayadora nun puede quedase sin sindicatos. Tamos indefensos.
El sindicalismu del sieglu XXI ta en que debe salir de les fábriques, relacionase colos movimientos sociales y dir por unos derechos básicos.

El trabayador tien que tener derechu a una vivienda, y conquistalu na práctica. Un trabayu y un salariu. Lo que se llama una renta básica o salariu social. El derechu a una educación y a una sanidá. Y eso que nun tea mercantilizao.

Nun podemos volver agora p’atrás. Despídente, quédeste sin empléu, acabes en paru, y púdreste. Pierdes el pisu, el to fíu nun podrá estudiar, nun podrás tener nin sanidá. Eso nun pué ser.
El sindicalismu debe garantizar a los ciudadanos eses coses básiques, esos derechos mínimos.



José Luis Llera
P’acabar quiero decir, como apuntaba al principiu, que sigo creyendo nel sindicalismu y nos sindicatos. Como yo los entiendo ¿eh?.
Hai que recuperar los valores que teníamos hai años. La honestidá y la honradez na forma de trabayar.
Ya intentar ilusionar otra vez a los trabayadores pa intentar atraer la confianza d’ellos, porque ensin ellos nun podemos facer nada.

Y nada, agradecevos que me hayais invitao a esta tertulia, que me prestó un montón. Vémonos na cai ¿non