Les bicicletes son pa tol añu.
Movilidá sostenible y ¿segura?
Na que participaron
• Raffa Fernández
Presidente d'Asturies Conbici. Asociación d'Usuarios/es de la Bici d'Asturies
• Rubén Marcos
Rutes en bici montaña. Blog argayu.com
• Felipe Aladro
Colectivu de Bici Fixed de Xixón
Presentación:
Tamos nuna nueva xornada de la tertulia ‘Pachín de Melás’ que quisimos dedicar a les bicicletes, inspirámonos nel títulu de la famosa obra de teatru de Fernando Fernán Gómez ‘Las bicicletas son para el verano’, al que-y dimos un poco la vuelta pa dicir que les bicicletes son pa tol añu, y dai un enfoque alrodiu la movilidá, la sostenibilidá y, cómo non, la sostenibilidá.
Como tertulianos propusímos-yos venir a un montón de xente, en principiu a Asturies Conbici, y ta equí el so presidente, Raffa Fernández, que vino con Xuan Antonio González. Esta asociación, que nació a raiz de la fusión de dos grupos, ‘Tronchacadenes’ y ‘Asturies pedalea’, ta últimamente faciendo munches coses, y tovía tuvimos oportunidá de velo hai poco cola ‘Bicicletada Popular’ que montaron el domingu 19 de setiembre, dientro de la ‘Selmana Europea de la Movilidá’, o el planu-guía que ficieron pa circular en bici por Xixón.
Tenemos tamién con nosotros a Rubén Marcos, que yera’l responsable de la web del grupu Trasgu BTT y agora ta llevando un blog particular, ‘Entamadas’ en blog.argayu.com, y a nada que vos metáis nesos blogs ye impresinante, tanto les rutes en bici que proponen como l’entusiasmu que transmiten. Polo tanto, la so visión de les bicis de montaña paecionos que yera un complementu ideal pal tema de la tertulia.
Y ta tamién equí Felipe Aladro, al que la verdá, hasta agora nun tenía tratao directamente, y sinceramente, nun sé bien de que va eso de la bici fixed del colectivu al que representa.
Felipe Aladro
Bono, representamos un puquiñín a la xente que ye usuaria de les bicicletes de piñón fixu, qu’equí tovía la xente nun les conoz muncho. Son bicis que nun tienen cambios y nun tienen frenos, entós el piñón va solidariu a la rueda colo que tanto’l movimientu como la frenada, fáeslos coles piernes.
Presentador
Ya, agora que lo dices, cuando tuve’n Dinamarca, había munches d’eses bicis que fales y llámáronme l’atención. Bueno, ye qu’ellí tol mundu anda en bici, xente xoven y xente mayor.
Bien, y tamién intentamos que viniera el mesmu Chechu Rubiera, aprovechando que dexó agora’l ciclismu profesional, punxímonos en contautu con él, y entusiasmó-y tamién la invitación, aunque-y coincidió que ta’n Menorca esti día, pero venía pa Uviéu el vienres, creo que, si lo aplazamos una semanuca, venía.
Y bueno, dexamos equí les presentaciones, arrancamos en sin más.
Nosotros, dende ‘Asturies Conbici’ somos una pequeña asociación dientro d’una federación d’asociaciones que defienden a la bicicleta y al usuariu de la bicicleta en toa España y Portugal. En total somos en total somos cuarenta y siete asociaciones en España y una en Portugal.
Y el conceptu que tenemos de la bicicleta ye como l’instrumentu pa un cambiu, pa un cambiu na forma de movese, pa un cambiu na forma de viaxar, pa un cambiu na forma de relacionase. Porque creyemos que la bici acerca a les persones, así como’l coche alluéñales. Nel coche métente nuna llata y distánciente de les persones. La bicicleta va facer que les persones puedan parar onde quieren, y falar con quien quieren, tanto si te mueves pola ciudá, vas al trabayu, vas a la compra o vas a lo que seya, como si tas viaxando, y faes, yo que sé, el Camín de Santiago, que fue añu santu esti, yo vengo de facer el Camín de Santiago. O una ruta… nosotros, en ‘Conbici’, cada dos años tenemos unos alcuentros que son dir diez díes por ehí en bicicleta, y cada vez prepáralo una asociación, un añu una de Málaga, otru añu una de Zaragoza, otru añu equí n’Asturies… y l’añu que vien toca en Almansa, ehí pola zona de Les Llagunes de Ruidera.
Entós, nun ye destacar la bici, si non destacar una vida diferente que se puede facer cola bicicleta, una forma diferente d’averase a les persones.
Tenemos les dos estayes, la de rutes y viaxar y facer grupos de xente que se relaciona de manera diferente, y tamién tenemos la parte de la ciudá, de defender los drechos de los usuarios de la bici, y nun sólo de la bici, si non tamién de los peatones y del transporte públicu.
Nosotros lo que defendemos ye, que cambie ya esi conceutu d’unes ciudaes que se diseñaron pal coche, qu’en munches ciudaes ta entamando a cambiar ya, y se diseñen ciudaes pa la xente, y pola xente entendemos, primero pal peatón, llueu pa la bici, y llueu pal transporte públicu. Y el coche que se vaya llimitando salvo en temes de carga y descarga y zones pa xente con discapacidá, qu’ellos sí que lo necesiten.
El resto que se llimite y que se penalice incluso l’usu del coche na ciudá y que se fagan aparcamientos disuasorios na periferia, de manera que nos movamos seguros tolos que queremos andar en bici.
Y si hasta agora dominaba’l coche, polo que naguamos ye que primero se faga una rede de víes ciclistes segures, del tipu carriles bici, pa que la xente qu’entame, s’atreva, pa que los neños vayan seguros, pa que la xente con della discapacidá, tamién pueda usar bicicletes y triciclos normales o eléctricos con seguridá, y una vegada fecho eso, que se fagan ciclocais y zones trenta. Por ciclocai pescanciamos la típica zona trenta o, cuando hai dos carriles, que’l de la drecha seya obligatoriu, nun como punxeron equí, aconseyable, y que se ponga algún tipu de medida pa que realmente se vaya a trenta y seya preferente pa bicis.
Que se reduzca la velocidá de los coches en definitiva y que seya más seguro circular en bicicleta.
Y, por supuestu, que se faga un plan de movilidá a llargu plazu, de manera que, gobierne quien gobierne, eso se lleve a cabu y nun dependamos del políticu de turnu que té nel cargu de turnu.
Y tamién que se faga una oficina de la bicicleta, como se tien fecho’n toles ciudaes qu’avanzaren no de la bici, pa dir vixilando esos cambios. Porque siempre surden roces colos peatones, colos coches… y pa que se vayan buscando soluciones práctiques a eso. Esi ye un poco’l nuestru plantegamientu xeneral.
Rubén MarcosYo nun voi estendeme tanto, el mi puntu de vista respeutu a la bici ye simplemente d'ociu y disfrute de la bici. Entamamos unos compañeros de trabayu hai unos tres años y mediu aprosimadamente y al añu decidimos dai el nome de ‘Trasgu BTT’ que igual ye lo que vos suena, y hai un mes escasu decidí seguir pola mio cuenta. Podría tar tamién como representante de ‘Asturcón BTT’, que tamién podrá sonaros, que ye l’asociación más numberosa de bici de montaña qu’hai equí n’Asturies, y un referente a nivel estatal y lo que facemos ye salir prácticamente tolos fines de selmana, reclutamos xente y l’únicu oxetivu ye divertise. Dientro la bici de montaña esisten munches formes diferentes de desfrutar, cada vez vamos tirando más a l’alta montaña, ye ciclo-montañismu como lo nomamos, garramos les bicis al llombu y subimos hasta los picos o hasta onde se pueda subir pa dempués baxar, otros tienen enfoques más de rallyes, o de facer rutes llargues.
Lo que facemos ye salir en grupu. Vamos xuntándonos xente y lo que intentamos tamién ye dar a conocer eses rutes que vamos faciendo, o esos sitios que vamos descubriendo. Yo soi montañeru dende guah.e y lo que más me sorprende ye que cada vez que salgo cola bici voi descubriendo sitios nuevos.
Nosotros garramos y diseñamos la ruta sol mapa, usando, bien rutes de montaña, o bien mapes del IGN [Institutu Xeográficu Nacional], o de Adrados o utilizando GPS o Google Earth, y con eso vamos trazando sol monte y buscando caminos o enllaces yendo cada vez más allá pa dir alcontrando los requexos más escondíos d’Asturies.
Un asistente
Citaste varios grupos, ‘Asturcón’, ‘Trasgu’, ta tamién ‘Pelayo’ que ye tamién bastante numberosu y faen lo de la vuelta al Conceyu de Xixón tolos años…vese qu’hai muncha afición equí a esi tema, y nun sólo de bici de montaña, si non tamíen de bici de carretera. A nada que salgas a les afueres de Xixón, ves a grupos… y a verdaderos pelotones circulando per ehí.
Rubén Marcos
Si, hai muncha, muncha xente n’ello, yo facía carretera tamién hai más de diez años, pero dexélo por aburrimientu, porque salía solu, pero agora, empieces a movete un poco por internet y ves que hai muncha xente n’ello, cada vez más.
Xente que comparte la to mesma forma de ver la vida. Aunque dientro d’ello hai tamién munchos puntos de vista, y ya nun digo de la bici en xeneral, si non mesmamente dientro la bici de montaña. Simplemente de los que salimos cada fin de selmana, hai xente que-y presta más baxando, que-y presta más subiendo, xente que disfruta portiando la bici hasta los picos, o que-y presta dir a los chigres de per ehí.
Bueno, ye combinar too un poco.
Nosotros somos un grupu de Xixón qu’intentamos agrupar a tola xente qu’anda con bicis de piñón fixu, y vémolso d’una forma un poco más social. Aprovechamos pa facer salides, carreres urbanes, xugamos al polo en bicicleta…
Lo que nos valió lo del piñón fixu foi que xente que na so vida tuviera andao en bicicleta, veles tan prestoses que-yos llama. Y hai un grupu pergrande de xente que ta faciendo usu d’esa bicicleta.
Yo, enantes, usaba muncho’l coche y agora, prácticamente, nun lu uso nada. Siempre que puedo ando en bicicleta d’un llau pa otru.
Son bicicletes que nun tienen frenos, igual a la xente puede asustá-y un poco eso, por aquello de que paez que nun les puedes controlar, pero col usu y la pericia acabes controlándoles, tienes la misma capacidá de frenáo qu’una persona que vaya con frenos convencionales, con frenos de discu o lo que seya.
Equí en Xixón, pese a que hai xente que lleva con ella dende hai tiempu, Pedro, por exemplu, de ‘Mensaxeros de la luna’, que lleva bastantes años, el ‘boom’ ye d’un añu hasta equí, incluso entamaron a fabricales equí, pero n’otros paises, como los Estaos Xuníos ya vien de los ochenta. Los mensaxeros de los ochenta y noventa demandaben bicicletes que tuvieren mui pocos problemes mecánicos, que fueren mui poco atractives pa los cacos y que fueren rápides, y too eso ye una bicicleta de piñón fixu.
Problemes mecánicos nun tienen, porque nun tienen nada, nin cables, nin desviador, nin frenos… y ye rápida porque tien una estructura de bici de carretera, son fines y puedes movete mui rápico pola ciudá.
Otra ventaxa grande que tienen ye que son mui económiques, porque munches veces restáurense de bicicletes que son antígues, de los años setenta, bicicletes qu’igual tan nun trasteru y tan condergaes a la chatarra, y quitando munchos ellementos y faciendo una pequeña modificación na rueda trasera, ye una bicicleta que ye totalmente útil.
Y bueno, como tolo que llama l’atención, tan saliendo tamién bicicletes que valen miles d’euros.
Pero son bicicletes que puedes fabricar tu mesmu y llevar la mecánica, porque son tan cencielles que nun van date dengún problema. Y axunten muncho a la xente, tanto pa facer carreres, xuegos… too. Nosotros, dende la páxina que tenemos intentamos organizar tolos meses algún tipu d’eventu, y tan salienbo bastante bien. Y la xente ta moviéndose con elles pola ciudá.
Raffa Fernández
Lo bono de la bici ye eso, que hai munches movilidaes. Seyas como seyas físicamente puedes averate a la bici. Si te presta’l monte, tienes la bici de montaña, si te van los retos, pues tienes bicis diferentes. Pero si yes una persona en sin munchu fondu físicu, que tas xubiláu y quies tornar a facer algo, que tienes neños y quies llevalos contigo… pues tamién tienes otres opciones.
Rubén Marcos
La edá nun ye un llímite. Tengo collacios de más de sesenta años que ya me prestaría a min andar como ellos.
Raffa Fernández
Nosotros tenemos un sociu con una pierna na más, y la otra de palu, y vien a facer rutes con nosotros.
Y tenemos otru con una discapacidá física mui fuerte, y muévese nun tricliclu eléctricu. Veslu caminar y casi nun puede, pero en sin embargu, col triciclu eléctricu a veces ponse coles dos ruedes poles rotondes n’Uviéu.
Tenemos xente con neños, que lleven un carrín y llévenlos atrás, o nuna siella.
Ye dicir, hai pa toles opciones.
Y llueu, eso, faciendo’l Camín de Santiago, topéme con xubilaos que nun-yos siguía la rueda.
Y yo mesmu tengo una discapacidá d’un veinti por cientu por un accidente que tuve’n moto, que me llevó un coche por delantre, y cuéstame más caminar que pedalear.
Entrúguenme delles veces “¿Cuál ye’l perfil de la vuestra asociación?”. El perfil de la asociación ye que nun tenemos perfil. Porque hai de too. Hai neños, families enteres, xente xubilada, xente que te llama por teléfonu y diz “llevo quince años en sin garrar la bici, ¿puedo facer una ruta con vosotros?" Pues si, nosotros siempre esperamos pol últimu y vamos al ritmu del últimu.
Y pol otru llau ta la pelea de conseguir, y ehí supongo que taréis vosotros tamién, que nos dexen meter les bicis nel tren y nos autobuses, pa poder facer un conocimientu d’Asturies sostenible, en sin falta d’usar el coche. Porque por desgracia, munches veces, nun hai posibilidá de meteles. Pa eso ya tienes que xuntar trenta o cuarenta pa usar un remolque, porque ye mui costoso.
Rubén Marcos
Sí, sí, los costes subieron muncho. Dir n’autobús sal rentable mui poques veces.
Delles veces sí ves que hai sitios señalizados pa discapacitaos y bicis. Pero otres, nun se sabe onde vien el vagón de discapacitaos, a veces vien alantre y a veces vien atrás, y nun sabes onde ponete cola bici.
Polo menos en Renfe sabes que ye’l vagón del medio, pero ¿los otros? Tas siempre perdíu.
A lo meyor ye que falta un poco de cultura.
Rubén Marcos
Sí, falta cultura y educación tamién por parte de los conductores.
Los coches, yo inclúyome, nun tenemos el vezu de ver a xente’n bici, de caltener les distancies… falta la cultura qu’hai nos paises más nórdicos, tanto polos usuarios como polos conductores.
Raffa Fernández
Pero algo que nun pasa n’Europa y que pasa equí, y que tampoco pasa’n ciudaes con más vezu n’esto, como San Sebastián o Barcelona, ye que la xente nun lleva lluces na bici. Y claro, ciudaes como Xixón, qu’ensiguida se fai de nueche, sobre too si ye un día nubláu, ye mui importante dir illumináu como un árbol de Navidá. Porque ye la única forma de que te vean. El coche nun ye adivín. Y además piensa que tolo que se va atopar son coches. Entós tenemos que facenos visibles.
Doite la razón. Nosotros, nel grupu Pelayo BTT, que ye d’equí de Xixón, tolos martes facemos rutes nocturnes y vamos siempre al monte, pero pa dir al monte equí tienes qu’atravesar too Xixón y dir hasta’l Monte Deva, por exemplu, o el Monte Areo, y los tramos por onde más peligru pasamos ye precísamente pola ciudá. En parte por culpa nuestra, porque nun solemos llevar chalecu, y llevamos lluces, pero non lo suficiente pa dir por ciudá.
Raffa Fernández
Nel tema del chalecu, muncha xente piensa que lo importante ye ponelo obligatorio, cuando munchos estudios tienen demostrao que los reflectantes más eficaces son los que van na bicicleta, porque tan a l’altura de los faros del coche. El chalecu ta más arriba. Un chalecu ta bien, si lu lleves, fantástico, pero lo fundamental ye llevar reflectantes na bici. Y llueu lluces, por supuestu, porque’n zones onde hai poca visibilidá hai que llevar lluces.
Y hai xente que, según merca la bici, quita los reflectantes. Eso ye una barbaridá. Los reflectantes que van nos radios, nun cruce vense munchísimo, pa que nun te lleve por delantre un coche cuando sal.
Rubén Marcos
Agora véndente tamién tires reflectantes pa poner nos brazos, nes piernes, pola ropa…y eso ayuda bastante.
Un asistente
¿Cómo veis eses bicis que punxeron por Xixón, que puedes pillar, usáles y volver a dexáles n’otru sitiu y tamién, qué valoración faceis de los carriles bici?
Raffa Fernández
Nel primer casu, les bicis públiques nun cumplen dengún oxetivu de los que se pretendía. La bicicleta pública nacía col oxetivu de ser un vehículu públicu alternativu, individual n’esti casu, pero alternativu al autobús.
Nun ye así, porque los horarios son nefastos. ¿Onde furrula esto? Pues en Barcelona, en París, en Sevilla, onde tienen unos horarios mui amplios. En Barcelona entama a les siete la mañana y acaba a les doce la nueche pola selmana, y el sin de selmana, les venticuatro hores. Entos, el que quier usar esa bicicleta pa movese pola ciudá val-y, bono, salvo qu’entres a les seis de la mañana a trabayar, pero esos son una minoría.
Equí non, equí empiézase a les ocho la mañana, que muncha xente entra a les ocho la mañana a trabayar, y acaba a les seis y media la tarde. Y claro, a les seis y media hai muncha xente trabayando. Y llueu, en branu, enriba, faen un horariu partíu, acaba a les dos y entama otra vegada a les cincu.
En principiu tan concebíes como daqué pa desplazate, y non pa facer un usu lúdicu, pero la realidá ye qu’eses bicis, como tienen un horariu tan malu, tan usándose por xente que necesita movese, pero nun tién unos horarios fixos, o por xubiláos, xente que tien tiempu, o el fin de selmana, pa facer ociu. Realmente úsense pa facer ociu.
Un asistente
Yo lo que nun entiendo ye por qué nun les ponen nel campus universitariu. Yera un sitiu ideal pa la xente que vien de fuera, en tren o autobús, y garra la bici y va hasta’l campus y llueu torna. O pa movése por allí.
Raffa Fernández
Tan tamién les bicicletes encarnaes eses que lleven una cesta, que son pa coyer y dexar nel mesmu sitiu. Eses si tan concebíes pal turista y pal ociu, tiénenles n’hoteles, n’asociaciones… y en La Llaboral sí que les tienen, y taben bien tamién pal campus.
Rubén Marcos
Equí pa les otres bicis, necesites la tarxeta ciudadana, pero en París creo que ye con una tarxeta de créditu, pagues un euro, y van illunináes. Tienen una dinamo con una lluz, y allí, que se fai de nueche pronto, y que conducen bastante más llocos qu’equí, veslos andar coles bicis tranquilamente pol mediu París. Ellí tienen bastante más ésitu qu’equí.
El sistema de Barcelona y de París ye’l mesmu, lo único que cambia ye’l númberu de bicis, creo que ye hasta la mesma empresa. Y ye verdá que va con tarxeta de crédito, pero la primera media hora nun te cobren, y si te pases, la siguiente media hora cóbrente trenta céntimos, y ya la siguiente hora cóbrente un euro vente, me paez. Va incrementándose según el tiempu que la uses, y lo que se potencia ye que s’use media hora namas.
Eso en cuanto a la primera pregunta, y a segunda, que yera solos carriles bici, nosotros agradecemos al Ayuntamientu de Xixón que nos consultara polo menos pa facer lo que fizo, neso demostró una democracia participativa, nun punxo unos técnicos pa facer lo que quieran y tal, y sí que nos ficieron casu bastante so per ónde facer los carriles, pero nun tanto en cómo facelos. Y fói por una cuestión interna del Ayuntamientu de qu’hai muncha resistencia a quitar places d’aparcamientu, que ye lo qu’había que facer, pero ye que, quitar places d’aparcamientu, quita votos, y aunque saben que teníen que facelo, al final nun se fai.
Por exemplu, la nuestra propuesta equí, en Poniente, nun yera esta chapuza que se fizo. Nós propunximos quitar l’aparcamientu en batería y ponelu’n llínia, o quitalu del too. Y esi espaciu que se ganaba, al coche, nun al peatón, convertilu n’una vía ciclista segura y segregada.
Porque ta’l problema de conceutu que ye’l d’acera-bici, nosotros nun queremos la acera-bici. ¿Por qué? Porque hai dos problemes, ún, porque la xente mayor nun distingue entre lo que ye la acera y lo que ye la vía ciclista, otru ye’l problema de los invidentes, que nun pueden distinguir entre la acera y la vía ciclista, y tampoco pueden entrenar a los perros lazarillo pa que distingan, porque nun hai denguna separación. Pero si pones una separación, por exemplu un bordiellu, entós entres en problemes colos que van en siella ruedes, que nun pueden atravesar el bordiellu, entós habría que facer un bordiellu redondeáu…, mui complicáo.
Cuando, si faes daqué como lo de la avenida La Constitución, tienes la zona pa bicis y los pasos de cebra pa que la xente con problemes de movilidá pase y ta too muncho más claro.
Rubén Marcos
De toes maneres, yo, el carril bici, la verdá que que lu uso bien poco. Casi siempre voi con priesa, nun por otra cosa. Garro carretera y…
Raffa Fernández
De toes maneres, yo entiendo qu’el carril bici nun tien que ser obligatoriu pa dir les bicis, si non que tien que ser pa la xente que nun se siente segura yendo por onde los coches.
Rubén Marcos
Ye que la bici ye un vehículu como cualquier otru. Al final lo que falta ye cultura d’usar la bici y que se respete.
Yo onde veo más necesariu el carril ye en víes interurbanes, aunque agora, bueno, hai sendes, aunque hai xente que les utiliza pa entrenar, y va per ehí demasiao rápido...
Raffa Fernández
Les sendes son d’usu compartíu y siempre hai que dar preferencia al peatón. Siempre.
Lo que defendemos ye que les bicicletes son vehículos, y que puedan dir pola carretera. Pero pa competir colos coches hai que movese a trenta y cincu o cuarenta y cincu. Entós ¿qué pedimos?, que haya más zones trenta, porque ehí compites perfectamente colos coches.
Y los que nun van sueltos, yo, que fago munches veces escursiones con neños, sí necesiten unes víes ciclistes segures, aunque obliguen a dar un rodeo. Pa eso son les víes ciclistes.
Colo qu’esa señal d’obligatorio bicis ta mal puesta. Tendría que haber una señal cuadrada, y ya-y lo pedimos dende Conbici a nivel nacional, d’aconseyable pa bicis, pero non obligatorio, porque si non un policía tocanarices puede ponete una multa pola avenida La Constitución.
L’Ayuntamientu díxonos que non, qu’esa señal, como nun hai otra, en principiu lo qu’indica ye qu’ehí hai una vía d’usu esclusivu pa bicis. Pero en realidá toos sabemos que ye una señal d’obligación.
Pasa como aquel policía que multó a un ciclista porque diba entrando na cai Corrida en dirección prohibida y enriba quitó-y puntos del carné de conducir. Resulta qu’aquel policía llevaba una máquina qu’automáticamente quita puntos cuando se pon una multa. Pero llueu nosotros, falando cola DXT [Dirección Xeneral de Tráficu], vimos qu’eso nunca nun prospera, porque nun te pueden quitar puntos d’un carné que nun tienes. Pero entamóse un revuelu alredor d’esa hestoria…
Lo lóxico ye que nun te multen por eso. Y lo lóxico sería esa señal que pedimos… pero tovía nun la hai.
Como tovía nun tan homologaos los carrinos. Esos que van detrás de la bici y lleven a un neñu o dos. N’España nun tan homologaos, y un guardia civil en práctiques, tocanarices, púnxose na Senda l’Osu a multar a tolos carrinos que cruzaben la carretera. Y fundió a una empresa que taba alquilando ellí aquellos carrinos, que tuvo que retiralos. Ye ridículo.
Tuvimos que movenos, y enviar cartes y tal, y bono, agora hai una propuesta de llei que creo que va a executase’n seis meses o así, pola que ya van tar homologáos esti tipu de vehículos.
Veo daqué contradictorio que por un llau prometan facer carriles-bici, nun sé, por Pablo Iglesias cuando fagan la reforma, y por otru, a la vez, empéñense’n facer un parking en El Parchís, que lu van a ampliar, ye decir, coches hasta la cocina.
Eso nun se puede facer. Falen de peatonalizar más casi pol centru, pero a la vez, faen más parkings. ¿Ónde tan los aparcamientos esos disuasorios?
Otru asistente
Si vos dais cuenta, nel últimu Plan Xeneral d’Ordenación Urbana, esi que tien fechu’l planteamientu inicial, y tovía la semana pasada acabó la fecha pa presentar allegaciones, nun tan contemplaos esos aparcamientos disuasorios pa nada.
Fálase de que nos edificios tien qu’haber aparcamientos de bici, pero non de los aparcamientos disuasorios pa poder usar transporte públicu, como los trenes o les bicicletes.
Una asistente
Ye curioso, porque ehí ta’l diseñu de ciudá. Hai que optar por una cosa o pola otra, si diseñes la ciudá priorizando esi tipu de movilidá, los carriles bici, el transporte públicu, eso implica munches coses qu’hai que tener en cuenta. Y nel documentu del plan échase’n falta un estudiu del tráficu seriu, diferentes alternatives d’ordenación, ver cómo tan comunicaos los barrios, qué llinies de tranporte públicu podríen reforzase, ónde hai que poner eses llínies…
Raffa Fernández
De fechu, nes allegaciones al plan, nosotros ficimos una sol tema que decíes de los aparcamientos nos edificios nuevos, porque falámoslo con un arquitectu y vimos que tenía la so trampa. Tal como ta redactáo, daquién puede decir: “non, ye que yo puse más metros de terraza pa qu’el aparcamientu seya la terraza, cuando la idega ye qu’el sitiu pa les bicis seya na planta baxa, a l’altura del portal o nel garaxe con rampa.
Y una empresa que se llama Vectio, tien feches unes allegaciones mui interesantes con un estudiu de los movimientos na ciudá, mui técnicu, pero que ta mui bien. Que si lu tienen en cuenta, creo que-yos va servir.
Y en Xixón ya hai dalgún aparcamientu disuasoriu. Ta El Molinón, que cuando nun hai partíu, verdaderamente funciona como aparcamientu disuasoriu, queda cerca la autopista y la xente va a aparcar ehí. Y agora, coles obres tienen puesto otru na avenida de Portugal.
Ellos defienden lo de facer parkings nel centru porque son pa los residentes, aunque toos lo sabemos que nun van ser sólo pa los residentes, pero la quexa vecinal dicen que ye que nun hai places pa residentes. En cada casa hai ya dos coches en vez d’ún y nun hai onde aparcalos. Eso ye verdá. Y si realmente fuera así taría bien. Quitamos los coches d’enriba y ganamos sitiu pa facer más zones peatonales ya eso. Pero toos sabemos lo que ye al final…
Y también pedimos, pero nun nos lo quisieron meter nel plan xeneral, que nos aparcamientos subterráneos hubiera una zona pa bicis cerca de la vixilancia, porque habría muncha xente que si tuviera la bici a techu y un poco segura diría al centru’n bicicleta.
Y falando un poco del usuariu. ¿Qué se podría facer pa fomentar l’usu responsable de la bici?¿Cómo se podría fomentar l’usu de la bici?
Raffa Fernández
Nosotros tenémoslo mui claro. Hai que llevar la bici a la escuela. Falamos de caminos escolares, andando o en bici, porque hai colexos nos que nun tien sentíu dir en bici. Falamos por exemplu col colexu Martín Blanco, equí nel Llano, y dixéronos que ellí vivíen toos alredor, que-yos llevaba más tiempu sacar la bici del trasteru y aparcala equí que venir andando. Pero nel colexu de El Piles, ficimos un proyeutu pilotu de caminos escolares en bici y foi un ésitu. Pero claro, eso podemos facelu un añu, pa tirar un poco por ello, pero llueu ye l’asociación de padres y los profesores los que tienen que continuar. Nel colexu de El Piles, lo que pasó fue que los que tiraben llueu por ello yeren profesores interinos, y al añu siguiente ya nun taben ellí y acabóse.
Una asistente
Y ¿de qué va eso?
Raffa Fernández
Los caminos escolares ye … como la llínia d’autobús. Faes un recorríu y vas recoyendo a la xente. Tú lleges cola bici y otros adultos y recueyes… nun sé… a tres neños, que se ponen detrás. Y llueu los adultos van turnándose, güei, por exemplu, dos padres y un profesor, y mañana van otros padres y otru profesor y asina. Y van faciendo’l recorríu recoyendo a los neños. Al principiu col sofitu de la policía local, hasta que toos van avezándose y vése que van bien, y llueu ya ellos solos.
Ye daqué guapo, y pa los neños prestosísimo, pero, claro, exixe que nos colexos haya una zona p’aparcar eses bicis, seguros y a techu. Y eso nun lo hai. Pero por exemplu, en Zarautz ye daqué habitual, hai un colexu a les afueres onde tolos neños van en bicicleta y ta acondicionáu tol baxo del colexu pa les bicicletes. Pero ye qu’ellí nun se perdió la cultura de la bici. Equí nun tenemos eso.
Un asistente
Soi profesor, y trabayo en San Martín del Rei Aurelio, y ellí ficieron un carril bici que llega al llau del colexu, pero tuve que presentar una quexa nel ayuntamientu pola seguridá del carril, porque sales del corredor del Nalón y al metete a la drecha, tienes una señal que nun ves y nun llegues a ver el carril bici hasta que tas enriba de él, y esa zona, además, nun ta illuminada, y a les ocho de la mañana tovía nun hai lluz y a les ocho la tarde tampoco. Y paezme que ye mui peligroso.
Raffa Fernández
Pues poner una cosa cosa como lo de les lluces eses de los pasos cebra, creo que diba a funcionar mui bien. Porque los coches, pola nueche, nun ven los pasos de cebra.
L’asistente d’antes
Pues onde’l Muséu del Ferrocarril hai tamién un carril bici, y allí tampoco hai illuminación ni lluces nel suelu.
Raffa Fernández
Tenémosla pedida. Bono, ¿nun punxeron ehí un semáforu agora? Sí, lo que ficieron foi poner un semáforu agora.
Otru asistente
Y respeuto a les señales de tráfico. Toi cansáu de ver a ciclistes que nun les resperen. Nun les respeta nadie.
Ehí, yo creo que tenemos un conceutu mui cuadriculáu. Nun se si sabéis que n’Alemaña, por exemplu, en toles cais que tienen una sola dirección y que tienen ancho suficiente, ta permitío dir en bicicleta en contra-dirección. Y en Burdeos, toles casi del centru ponen “prohibido xirar a la drecha, esceuto bicis”,…, “dirección prohibida, esceuto bicis”, porque, en realidá, la bicicleta, si vas por una dirección prohibida, si vas por una acera ancha, si vas a una velocidá moderada, prudente, con respetu al peatón, nun pasa nada. Y n’esos países nun hai accidentabilidá de bicis apenes.
Pero equí, o nun hai norma, o somos supernormativos. Ye que nun ye lo mesmo saltate un semáforu que ye sólo pa peatones en bicicleta o en coche. El coche ye que ye una máquina de matar, entós hai que parálu de dalguna manera, porque los peatones tienen que pasar. Pero cola bici nun hai problema por saltáte un semáforu. Yo creo que ye un poco educar na responsabilidá. Si vas por una acera, nun puedes dir de cualquier manera, tienes que dir a la velocidá del peatón, con munchu respetu, y separándote d’él. Y si vas nuna cai a contra-dirección, vas bien pegáu y si tienes que paráte, páreste. Y si tas nun semáforu que sólo ye pa peatones y nun hai peatones, tar ellí paráu nun tien xacíu. Nun coche sí, porque puede ser peligroso, que te salga un neñu que nun veas o lo que seya. Eso n’otros paises ta mui normalizao, y les señales nun son les mesmes pa los coches que pa les bicis. Si toos fuéramos andando o en bici, nun habría accidentes en Xixón. Los accidentes vienen polos coches. Son los peligrosos.
Rubén Marcos
Discrepo un poco. En ciudaes como en Holanda, como peatón tienes que andar con mil güeyos porque te pasen por enriba cola bici…que nun son mortales los accidentes… puede, pero sí qu’hai munchos accidentes.
Un asistente
Y en sitios onde hai muncha xente y muncha densidá de bicis, como Pekín, eso tien que ser tremendo.
Rubén Marcos
En xeneral fai falta concienciar a los ciclistes, pero tamién a los peatones. Y eso va pasar tamién colos coches eléctricos. Guiámonos munches veces pol oyíu. Yo, cada vez que garro la bici, tengo que andar esquivando a la xente, pero pola carretera. Pol barriu L’Arena ye esaxeráo, van sin mirar, como nun vien un coche, piensen que nun hai nada.
Raffa Fernández
Y na avenida Shultz, los peatones atropellen a los ciclistes, ye que nun miren. Crucen en sin mirar.
Un asistente
Lo que me paez importante ye qu’esto se vea, nun sólo nos colexos, sinon que forme parte del sistema educativu. Lo que mas muertos provoca agora mesmo son los coches. Y nun s’educa n’ello. Tenía que ser, lliteralmente, una asignatura, una asignatura d’educación vial, teórica y práctica. Y que un chaval estudie lo que ye un vehículu a motor, y qué alternatives hai, la bici o lo que seya. Una asignatura reglada, nun sé, d’una hora a la selmana. Y contar lo que tu tas explicando güei aquí de les bicis. Eso ye básico.
Si, además, nun tienen nin que diseñala. Ya la tienen diseñada. Hai una web, “Conbici Al Cole”, onde ya ta tratau’l tema de la bici en cada asignatura. En toes. N’informática, con google maps pa diseñar caminos escolares, n’educación física, pues cómo dir garrando habilidaes pa dir soltando una mano, moviendo conos, lo que seya, en plástica…, en toles asignatures. Ta colgáo na rede, gratuíto, pa que’l profesor que quiera lo trabaye, el colexu que quiera lo implante. Y mandamos cartes a los directores informando… sólo fai falta que se use.
Y tenemos tamién otra web, tenemos los enllaces de toes na nuestra páxina, “bicinstituto.com”que diseñó l’asociación de Barcelona, na misma llinia de la de “Conbici Al Cole”, que foron subvencionaes pol Ministeriu de Mediuambiente. Ta ehí’l material, sólo falta la voluntá d’usalu.
Y l’otru tema que tamos peleando, llámase “campaña de sensibilización a conductores”. Si vos fixáis, el planu-guía que tenemos publicáo, entama con “Pa los conductores”, porque paez que siempre s’empieza pola bici… “conseyos pa los ciclistes p’andar pola cai”…non, non, vamos ver, si lo más peligroso ye’l coche, vamos entamar por “conseyos pal coche cuando s’atopa una bici”, y llueu, sí, “conseyos pal ciclista que pasa entre los coches y entre los peatones”, sobre too, cuidao colos peatones, y tamién conseyos pal peatón, polo que tamos falando, llueu falamos de seguridá activa y seguridá pasiva. Lo de seguridá pasiva refierse al tema de llevar lluces, llevar timbre… y tal, y seguridá activa ye esa actitú que tienes que llevar en bicicleta d’anticipate, conducir como si fueres invisible, como si’l coche nun va vete… por si acasu, llueu, si te ve, meyor. Y tamién hai que facese visibles, nun dir pegáu al bordiellu, que ye lo que fai la mayoría de la xente cuando entama a andar en bici, porque que cuando’l coche ya nun te ve definitivamente. Non, non, tu pol tu carril, pol medio, que te vean bien, que nun te abra la puerta un coche que te aparcáu y te la comas, y si te piten, que piten, tu faite ver.
Tenemos unes camisetes de l’asociación que ponen detrás “Faite ver”, nel mercáu, al cole, nel chigre… faite ver.
Y falando del chigre, nosotros tamien fomentamos l’usu de la bici pa salir. Home, nun pases de les dos cerveces, o de la botella de sidra. Pero, muncha xente, en vez de salir en coche, garra la bici.
Nosotros facemos muncho tamién el bici-tapeo. Puede falar Xuan d’ello, porque ye’l que lo suel organizar.
Consiste’n mandános unos correos a tolos socios d’Asturiesconbici y a los non-socios y quedamos cola xente. Yo falo primero con varios empresarios de la hostelería y vémonos nun chigre y ya tenemos preparaos unos pinchos y sidra y tal. Y así vamos visitando dos o tres sidreríes. Pero en sin pasanos ¿eh?.
Raffa Fernández
Y ye increible. Con cincu euros vamos a tres sidreríes, tomamos tolo que nos apetez, y van neños, va xente mayor, de too, pónennos una bona cantidá de pinchos, porque además enróllense con nosotros bastante y pases la tardi-nueche y sobren perres.
Y ye una pasada llegar y candar treinta y cincu bicis, que yéramos treinta y cincu la última vegada, un ocho de xineru, con temporal… nevónos dafechu. Yera prestosísimo.
Xuan Antonio González
Ye que lo de dir en grupu protexe muncho al que va na bicicleta. Y quería relacionar esto colo de la masa crítica. Intentamos quedar un vienres al mes, en Xixón ye’l últimu vienres de cada mes, o seya, mañana.
Raffa Fernández
Quede claro qu’esto ye un movimientu popular, de xente que anda en bicicleta, nun de l’asociación. Nun tien llíderes nin tien sigles. Y faise’n munches ciudaes, nun ye sólo’n Xixón. En Uviéu ye’l primer vienres de cada mes. En Madrid faise’l tercer xueves de cada mes. Y distintes ciudaes d’Europa tamién lo faen, y n’Estaos Xuníos tamién… Y va la xente que quier. Hai una web qu’informa, critical-mass y equí n’Asturies, MasaCriticaAsturies.
Xuan Antonio González
Lo que pretendemos ye reivindicar un espaciu na ciudá, que se nos vea. Y la seguridá que te da dir en grupu ye impagable. Vas siempre col estress cuando vas solu, pero cuando vas en grupu, vas parando nos semáforos, esperando por toos…
Emplázo-vos a los que queráis mañana a les ocho na esquina Cortefiel. Un paseín de cuarenta y cincu menutos pola ciudá. Tranquilinos. Pa que vean los coches qu’esistimos.
Ye la posibilidá que tenemos de comprobar cómo se puede vivir en bicicleta en grupu, de forma segura.
A la hora de conseguir concienciar a la xente a que garre la bici, ¿tais viendo qu’económicamente pueda interesar tamién a la xente en llugar del coche?
Raffa Fernández
Ye mui difícil, porque lo más difícil de cambiar n’esta vida son los hábitos, y tovía más difícil cambiar los hábitos de movilidá. Cuando sales de casa sales como sales siempre, y nun te pares a pensar qu’hai otra forma meyor de facelo. Sales como t’enseñaron, y ¿qué nos enseñaron? Que hai qu’usar el coche pa too.
Además, el coche que tengas va dar forma a la to personalidá. Si yes una persona fuerte, una persona de poderío, tienes que tener un BMW, porque si non, nun yes nadie. Educáronnos neso, metiéronnoslo equí na tiesta cola publicidá. Y salir d’eso cuesta.
A nosotros contábanos un sociu que diba tolos díes a trabayar al parque tecnolóxicu y garraba’l tren y metía ellí la bici y baxábase’n Llugones y garraba un carril bici y llegaba hasta la empresa. Y taben ellí los compañeros quexándose… “ye que’l gasoil ta mui caro”… “que va, ta baratísimo”, dicía él, “teníen que lu subir más”, “qué burrada dices”, contestáben-y, “¿tu en que vienes?”, “en coche”, “¿y con quien?”, “solu”, “¿y tu?”, ”yo solu tamien”. “¿Veis?, ta baratísimo, mira, yo tengo una tarxeta de la CTA [Consorciu de Transportes d’Asturies] y vengo tolos díes y pago nun sé si vente euros al mes o una cosa asina, a mi salme baratísimo. Tendría que tar más caro pa que tuviérais que facer lo mesmo”.
Ye que la xente nun se para a pensalo. Y hai muncha xente que tovía nun sabe que en Xixón, nes paraes d’autobús, ponte’l tiempu que va tardar l’autobús, o si non, puedes mandar un SMS y dizte a qué hora va pasar l’autobús. Cuesta informase d’otra manera de movese que nun seya’l coche.
Y nel colexu igual. A los neños nun val deci-yos “hai, qué bonito es el autobús”. Non, hai que decir “neños, el vienres nun tenemos clase y vamos dir a Villabona en tren coles bicis, y venimos toos en bicicleta hasta’l colexu". Y esa ye una forma de dase cuenta que puedes movéte d’otra manera. Porque lo tienes fecho, tiéneslo vivido. Puédese.
Pero, si nun te lo enseñen, si nun hai daquién que lo faga contigo, nun lo vas a aprender.
Y los colectivos ye a lo que t’ayuden, tanto los que faen escursiones, como los que son más urbanos. Y aprendes munches coses. Ves más posibilidaes.
Xuan Antonio González
P’acabar, quería comentar que tenemos fecho unos estudios comparativos y ta comprobao que la bicicleta gana con un bon cachu al coche pa movese pola ciudá. Val, puedes decir, “si tengo’l parking ehí nel Parchís voi al centru y aparco ellí”, pero ye que tienes que llegar hasta ellí, y colos semáforos y colos atascos qu’hai, tardes igual venti menutos en llegar, mientres que cola bicicleta vas metíendote y llegues muncho primero, y con seguridá.
La comparativa que ficimos yera facer recaos por Xixón colos cuatro medios, ún la bicicleta, otru la moto, otru el peatón que podía usar transporte públicu y otru el coche. Y siempre quedaba l’últimu el coche. Hasta’l peatón en transporte públicu ganaba al coche. Eso sí, el coche tenía que aparcar bien. Y llueu mirábense los costes, y claro, siempre ganaba ehí tamién la bicicleta, porque’l peatón tenía que pagar l’autobús. Y la que-y llegaba cerca a la bici yera la moto, pero claro, la moto tien munchos más costes.
Y tenemos falao de tolos problemes del coche menos de ún, que ye que tamos tragándonos la nuestra propia mierda. Y los nuestros fíos tan tragando la mierda de los nuestros coches. Y eso nun vien nes estadístiques d’accidentabilidá pero sí nes de mortalidá, y nes de cánceres, y nes d’alerxes. ¿Por qué los neños tienen tantes alerxes? Por esto. Tamos envelenándonos col nuestru propiu fumu. Y nun nos importa además. Nun nos quexamos d’eso. Y seguimos col coche.
Y la bici al contrario. Ta demostrao que media horina de bici al día ye, pal corazón, la meyor melecina. Meyor que una aspirina d’eses.
