Tertulia: ¿Necesitamos una incineradora?

Resumen de la tertulia del 23 de marzu de 2010


¿ Necesitamos una incineradora piquiñina... y galana ?


Na que participaron

Fructuoso Pontigo
Portavoz del Conceyu contra la Incineración y miembru de la Coordinadora Ecoloxista d'Asturies

José Antonio Ballesteros
Abogáu. Miembru de la Mesa Federal de Los Verdes d'Asturies

Yolanda González
Abogada. Portavoz d'Unidá Nacionalista Asturiana en Xixón

Faciéndose cargu la presentación Tino Fernández


Tino Fernández
Como ya sabeis el PSOE y el PP tan perfeutamente informáos de que güei díbamos facer una tertulia sola incineradora y decidieron pactar el construir la incineradora’n Serín. Imaxino que ya toos lo lleísteis na prensa.
Pa entamar a tomar contautu podemos facer valoraciones de la noticia, si quiés empezar, Fruti, ya que tas ehí el primeru pola izquierda...


Fructuoso Pontigo
Ye un poco complicáo facer valoraciones porque tampoco conocemos l’alcuerdu. Sí ye verdá que yera un poco estraño que’l PP, que ye pro-incineradora’n toa España, equí se pronunciara’n contra, y el PSOE, que ye contra-incineración en toa España, incluso onde gobierna, se manifieste a favor. Equí hai una contradicción importante.

Ye cierto que ya xente del PP tenía trasladáo que hai una parte’l partíu que sí ta a favor de la incineración y había otros que teníen una duda razonable, y bueno, paez ser que triunfaron los de a favor de la incineración en sin duda razonable nin osties.
Creo que, incluso políticamente, ellos comenten un error grave, porque ye verdá qu’agora tienen una posibilidá de gobernar n’Asturies, y esti podía ser un tema col que da-y caña a Areces. El qu’agora vayan de la mano creo que beneficia’l PSOE. Ye una xugada mui bona del PSOE. Al final van aceptar too a cambiu que dexen a les cementeres quemar neumáticos.

Nun sabemos les condiciones del acuerdu, pero’l conseyeru tenía ya mui claro que la incineradora diba agora, colo que con o sin alcuerdu col PP, eso diba dir alantre, porque ellos tienen mayoría’n COXERSA.
Pero fago además una lletura personal, y si la postura’l PP nun me sorprende, cosa que podía prevese, a min lo que me sorprende ye lo d’Izquierda Unida. A mi, que diga Izquierda Unida qu’eso nun ye suficiente como pa romper el pactu de gobiernu, preocupóme bastante.
Yo falé cola xente’l PP y dixéronme que la postura d’ellos tovía nun ye firme porque nun hubo comité executivu. Nun sé si n’Izquierda Unida hubo comité executivu o si la coalición tiense xuntáo y decidío esa postura o non. Pero creo que tanto’l PP como Izquierda Unida, en clave electoral, tan faciéndolo mui mal. Y una vez más, el PSOE, aún faciéndolo mal, electoralmente ta faciéndolo bien, y va ganá-yos la partida.


José Antonio Ballesteros
L’análisis d’esi pautu ta claro, el PSOE taba por promover esta instalación. Dientro de lo que ye’l ámbitu nacional, en dellos sitios, y sobre tóu dende’l gobiernu central el discursu aparente paez que ye’l de conciencia ambiental, y tien les sos pincelaes d’economía verde, anque seya munches veces más verbal que material.
Pero equí non, equí yo creo que ye de les comunidaes onde hai una menor conciencia ambiental y una mayor implicación cola industria enerxética y de la construcción, de les grandes constructores, y paez qu’agora hai la visión de que, si antes el PP yera’l partíu de la banca y de la gran industria, equí ye’l PSOE’l que capta eses relaciones, el que fai por captar esa clientela.

Y, bueno, pues la manera de facelo ye da-y munchu negociu a la gran industria. Ye especialmente llamentable nel tema enerxéticu y nel tema de la incineradora, porque eso supón restar negociu a otres alternatives, que seríen la del pequeñu emprendedor, la de la pequeña empresa, que amás supón la creación de trabayu, porque, nel so momentu truxímos equí, a Xixón precísamente, a la directora de l’axencia catalana de resíduos, y esplicónos qu’ella, cuando llegó p’asumir esta axencia, lo que fizo fue sacar una llei nueva qu’obliga a que nun se pueda recibir dengún resíduu que nun tenga pasáo previamente por un tratamientu. Y con esto tiense conseguío que se creen setecientes empreses nel sector, lo que supón miles d’empleos, miles d’empleos verdes además.

L’alternativa que presenta’l PSOE equí ye d’ochenta a cien empleos na incineradora y dellos más n’abastecimientu y transporte y poco más. O seya, tamos planteando cien o doscientos empleos frente a, a lo meyor, dos mil y picu que se podíen crear pol reciclaxe, la reutilización, etcétera.
El primer sistema beneficia a la gran industria, a la gran empresa, multinacional seguramente, que vaya axudicase esi proyeutu, y l’otru a una pluralidá de munchos pequeños productores, que polo normal, seríen llocales.
Y too eso además en sin tener en cuenta’l coste ambiental qu’eso va tener, el coste pa la salú de les persones de tou’l centru d’Asturies, que somos en tornu a les ochocientes mil persones nel radiu d’influencia que pueden tener les emisiones d’esa incineradora, y tamién tol coste económicu que va tener pa tolos asturianos.
Porque dicen: “bueno, pactamos col PP que nun va tener coste pa los ayuntamientos”, pero’l coste va ser, en definitiva, pa los usuarios, seya a través del ayuntamientu, seya a través de COGERSA o seya a través d’una empresa concesionaria. En cualquier casu, quien va pagálo al final somos tolos usuarios que paguemos les tases de tratamientu de basures.


Yolanda González
Sola incineradora y alternatives, y oyendo a la xente que vino equí y contó esperiencies d’otros sitios, paezme qu’una reflesión mui interesante, que agora ya ye pasáo, porque por desgracia güei ya dimos un pasu más, ye que llevamos ya perdíos pa buscar alternatives un montón d’años onde se vía qu’evidentemente’l vertederu colmataba, porque, bono, l’espaciu ye finitu. Y eso tien una responsabilidá política que-y habrá qu’esixir a alguien.

Taben vendiéndonos esto como daqué absolutamente inevitable, dicíen que básicamente ya nun hai tiempu, les esperiencies que tan saliendo bien n’otros países requieren un tiempu d’adaptación d’una media de diez años y equí ya llevábemos perdíos munchos.
Y cola noticia de güei, cola malísima noticia de güei, la duda que m’entra ye si tovía tenemos capacidá pa paralo.
Porque hasta’l títulu de la tertulia quedó vieyu. Falábase d’una incineradora más pequeña, lo que tampoco nos valía, pero agora lo que tenemos ye que nun se va facer una incineradora más pequeña. La única alternativa que paecen dar ye la de que les cementeres quemen algún tipu de residuu más. Y además, da la sensación qu’un de los puntos centrales del pautu ente’l PP y el PSOE ye que los ayuntamientos nun vayan a a pagar esi coste. Aunque habrá que ver al final qué hai de cierto’n too eso.

Y ye una cosa llamentable. Aparte del análisis que podamos faer, que yo creo que ta claru, teníemos que ver si tovía hai alternatives, si tovía tamos a tiempu de tomar medides de reciclaxe pa conseguir que la incineración seya la última de les fases, que ye lo que manda la directiva europea. Enfin, si ya lo perdimos too o si tovía tenemos daqué que faer.


Fructuoso Pontigo
Por aclarar delles coses, cuando se diz qu’el vertederu s’acaba, ye falso. Ye algo que repite’l de COGERSA dende hai diez años, pero ye mentira, el vertederu nun s’acaba.
Insisto nes cifres, n’Asturies échense tolos años tres millones ochocientes mil tonelaes a vertederos, y los residuos urbanos son el catorce por cientu d’esos residuos. L’añu pasáu fueron quinientes mil toneláes. Nun se puede decir que topamos sitiu pa les ochentaiseis tonelaes y nun topamos sitiu pa les catorce. Y encima, d’esi catorte por cientu qu’echamos al vertederu, somos la comunidá d’España que menos recicla. Tamos solo por enriba de Ceuta, Melilla y Murcia.
Y sólo quitando la fracción orgánica d’ello, ya tendríamos el cuarenta por cientu menos, pero aunque nun ficiéramos nada con ello, como faen en Valencia, solamente con que la metanizáramos ya tendríamos un cuarenta por ciento menos de volumen.
O seya, primero, el vertederu nun s’acaba, pero si hubiera trayío un mapa aéreu de COGERSA, podría deci-vos qué terrenos tien compráo ya COGERSA y cuanto más hai d’espaciu.

Y además, ayer, Buendía, que nun tien nin idega, dixo qu’ellos diben coyer les escories y lleváles a les carreteres, pero n’Asturies, les escories de térmiques, que son resíduos asimilables a urbanos, van al vertederu, porque nun hai demanda. Por exemplu la cementera ya xenera un millón de tonelaes d’escories, polo que nun tien sentíu que les d’incineradora, que además son resíduos peligrosos, acaben n’una carretera, cuando les otres, que son asimilables, tan llevándoles al vertederu porque nun hai sitiu.

Entos lo primero que hai que desmentir ye’l discursu con que nos vienen machacando de que s’acaba’l vertederu. Porque tienen convencío a muncha xente, que los lleven ellí a COGERSA y dicen-yos qu’esto acábase, pero nun dicen que toos aquellos praos d’alredor, y los valles d’alantre y d’atrás son d’ellos, y los qu’hai a continuación van acabar comprándolos.

Y hai alternatives de sobra, por exemplu pola que tien apostao’l movimientu cívicu, que ye la de siempre, separar la fracción orgánica, que ye’l cuarenta por cientu, y reciclar más. Esto fáenlo’n munchos sitios d’España, consíguense tases de recuperación del 82 por cientu de la basura y queda’l final menos del 20 por cientu del residuu, colo que al final vamos a tener menos que una incineradora que xenera entre un 18 y un 32 por cientu nes qu’hai n’España.
Colo cual, los tratamientos que proponemos, siendo más caros qu’el que tenemos agora, por supuestu, tamos falando d’una media de 45 euros por tonelada, van ser siempre muncho más baratos que la incineradora, primero, porque la inversión ye muncho menor, una planta de biometanización nun pasa de los 60 millones d’euros, y equí falamos ya de unos 250 millones d’euros, y en sin sobrecostes.

Un asistente
A preciu actual, 400 millones

Fructuoso Pontigo
Más el vertederu d’escories, qu’hai que impermeabilizalu y ye especial. Y llueu’l gastu financieru, porque habrá que ver en qué condiciones de mercáu consigues eses perres. Porque’l sistema qu’ellos proponen agora mesmo ye que COGERSA asume’l riesgu en sin avales, o seya, en sin que los ayuntamientos firmen, que ye lo que dixeron, colo que les entidaes bancaries nun te van a dar eso a cualquier preciu.
Darán-yoslos efectivamente, porque COGERSA xenera muncho, pero al final va cobrátelo na tasa. Que ye lo que ta pasando n’otros sitios d’España, como’n Palma de Mallorca. Ellí lo que fizo la empresa fue pedir a un bancu y poner el dineru y ta cobrando na tasa la inversión, la xestión y lo demás.
Y eso van pagálo equí los asturianos, y ye un tema que tenía que saber la xente.

El problema que tenemos equí n’Asturies ye que hasta agora nun tuvimos xestión de resíduos. Equí fízose un consorciu y hasta agora’l Principado nun gastó nin un duru, todo diba con fondos europeos. De los millones d’inversión que tien COGERSA fecho, la inversión de los ayuntamientos supón el 1,5 por cientu del dineru que se tien gastao. Ye más, da-yos más COGERSA que lo que ponen los ayuntamientos, ye un casu graciosísimu, porque-yos da contenedores, da-yos de too. Ye más, hai ayuntamientos a los que-yos fai la recoyía, y enriba una parte subvencionen-yosla.
Da-yos puntos llimpios, eso nun pasa en dengún llau d’España y posiblemente igual en dengún d’Europa.
Ye una situación atípica. Hasta agoga COGERSA xestionaba, organizaba baxo’l so criteriu, baxo’l criteriu d’una sola persona, que yera’l xerente, que ye un tío que se lo curra mui bien y tienlos a toos abducíos. Va comiéndo-yos ya oreya ún a ún. Ya de cuando-yos compró les finques.
Decía-yos: “non home non, esto nun va goler na puta vida, vamos poner equí un merenderu”, eso díxolo él al principiu. Y pasaron 27 años y claro, aquello fiede, nun lo aguanta nin xesús. Ye normal, pero los paisanos siguén confiando en él, ¿por qué?, porque yos diz “oye, nun te preocupes qu’el to fíu entra a trabayar, o el tu sobrín tamién, o cómprote’l to práu”.
Y tien xenerao ellí una rede d’aliaos que nun veas, anden a hosties agora entre los vecinos poles subvenciones, y nun protesten a COGERSA, si non entre ellos, porque él repartía-yos 45 millones de pesetes, y protesten dos de Carreño porque dicen que quieren ca ún 15 millones, pero nun-y piden más, sinon que anden a osties entre ellos por esos 15 millones.

Llevamos ya 24 años peleando contra les incineradores n’Asturies, ya empezamos cola de Llugones, y Santiago, el xerente de COXERSA, decía d’aquella que les incineradores nun teníen ningún problema, y agora diz que les últimes que se tienen puesto son bones, que les d’antes yeren males, cuando tien él mismu una puesta d’eses anteriores.

Y ¿cuál ye’l nuestru fracasu? Yo creo que nun fuímos capaces de trasladar esti mensaxe de preocupación a la ciudadanía. Y la xente nun tien ni idega d’esti tema. Hai unos pocos convencíos, pocos, pero la inmensa mayoría non. Y les charres que tamos dando son un fracasu, nun va nin dios por más que les anuncies. Y dicen: “ye que hai que salir a la cai”, pero ¿quién?

Entos, la pregunta que decíes, ¿qué nos cabe facer? Home, pues tenemos muncho que facer. Agora hai un alcuerdu, pero hai que recordar qu’esto ya s’aprobó nel añu 2003 en COGERSA. Así que ya veremos, creo que tovía nos queda munchu recorríu, y hai qu’agotar toles víes y seguir informando. Y nun parar la vía llegal. Equí, los que teneis conocimientu podéis orientanos a los que nun los tenemos.
Esto ye como lo de la regasificadora, cuando entamamos contra ella, ya taba decidida, ya igual nin la llegamos a ver, y eso que tan empezando les obres.
Estes coses dan munches vueltes, y depende de lo que afinemos. Home, si vamos pa casa toos…, ponen la incineradora y el cementeriu de resíduos radiactivos. Pero si, coles llimitaciones que tenemos, vamos trabayando, diremos faciendo coses.


Un asistente
Dos detalles, l’otru día tuvo equí Joan Marc, que tuvo col tema de la incineradora’n Bruseles, y lo primero que dixo ye que nun puede valir 250 millones d’euros, ya nin siquiera cola financiación, en viendo’l coste de les qu’hai per ehí. Una incineradora d’esti tamañu tien que valir polo menos cuatrocientos y picu millones. Y evidentemente eso va a aparecer cuando salga un concursu, porque nadie va a optar a facelo con una diferencia tan grande.


Tino Fernández
Bono, Muselón-2.


El mesmu asistente
Y respeutu a la cuestión de los avales, creo que tal como tan los estatutos de COGERSA, si la incineradora la contrata COGERSA, aprobada pol consorciu y contratada pola compañía, eso obliga, díganlo o nun lo digan, a que detrás los avalistas seyan los socios y propietarios de COGERSA, y esos son los ayuntamientos. Y la única forma’n que se vieran lliberáos d’esi compromisu ye’l de la apuesta del PP, que la planta la faga una empresa de forma independiente. Aunque dende llueu va trasmitise’l coste a los ayuntamientos d’una manera o d’otra.

Y esta posición de que taben a favor de la incineradora ya la sabemos dende hai cincu años, nun hai dengún misteriu, l’alcuerdu del 2003 ye de conocimientu públicu, y agora entama’l procedimientu, nun tan social, sinon más bien llegal: pedir les llicencies, la declaración d’impactu ambiental… y bono, les medíes d’intervención ehí tienen evidentemente menos posibilidaes que cuando políticamente nun taben d’alcuerdu. Además, davos cuenta que son unos ciento sesenta los que voten en COGERSA, entre alcaldes, conceyales y otros representantes nomaos polos ayuntamientos, y además nun ye un home o una muyer, un votu, sinon proporcional a la participación na inversión, colo cual eso cómenselo ente cuatro o cinco, son algunos ayuntamientos grandes, del PSOE y el PP, y el Principado, y ya tienen la mayoría.


Una asistente
A la mayor parte de los ayuntamientos que tan a les afueres el tema de la contaminación nun-yos preocupa porque ta lloñe. Hai que garralos poles perres. Cuando-yos digan que tienen que pagar en vez que como paguen agora, que nun sé si son 12 euros… sí… 12,90, tengan que pagar 120.
Y eso que que nun pagamos los ayuntamientos, el de L.lena paga más de cuatrocientos mil euros al añu pola recoyía de basura.


Fructuoso Pontigo
Home claro que paguen, faltaría más, pero llueu tan les subvenciones pa les instalaciones. Y llueu ta la xestión y la inversión que hai que amortizar.


La mesma asistente
Sí, si, pero llueu si en vez de cuatrocientos mil, tienes que pagar un millón, eso pa ayuntamientos pequeños… Por eso ellos dicen eso de que a los ayuntamientos nun-yos cueste.
Por eso equí los que tienen que lluchar pol tema la salú son los de Xixón y la xente más cercana, que creen que van ser los más perxudicaos. Pero en L.lena, nun-yos paez que va llegar la contaminación, llegue o non, nun ye una cosa que-yos preocupe muncho, pero claro, cuando fales a la xente que van tener que pagar más… eso ya-yos preocupa un poco más.

Y otra cosa cola que hai que xugar, creo, ye col nacionalismu, hai que facer ver a la xente que van venir a quemar coses de fuera, y por ehí la xente sí que ya nun pasa. Ye una de les coses que ví nun foru que fice, que la xente dicía: “non ye que a min, lo que más me preocupa ye que van denir a quemar coses de Lleón”. Y eso, aunque paeza una tontería, a la xente sí que non-y gusta.
Entos habrá que buscar la manera de dai a tol mundu per onde más-y duela.


Fructuoso Pontigo
Ye verdá qu’eso ta saliendo reiteradamente, por exemplo, Churruca, el d’equí de Xixón, dizlo sistemáticamente. Y ye gracioso, porque’n COGERSA lleven quemándose residuos de fuera dende hai munchos años.


La asistente d’antes
Ya, pero eso la xente nun lo sabe.


Fructuoso Pontigo
El tránsito de residuos ye algo típico. N’Alemaña impórtense residuos, porque ellí nun tienen volumen de resíduos bastante pa llevar a incinerar.


José Antonio Ballesteros
Ye verdá. El casu d’Alemaña fue que se plantearon unes incineradores pa quemar tola basusa y a continuación vinieron los programes de reciclaxe, de reutilización, de reducción, etcétera y baxó munchísimo’l residuu a quemar na incineradora.
Y ¿qué pasa?, qu’aquello, como ye un negociu, tien que caltenése, hai que tar metiendo basura, y tráise d’Italia. Lo que taba ellí apilao poles cais de Nápoles, agora ta quemándose n’Alemaña.

Y equí tamién se proyeuta una incineradora preparada pa quemar tola basura d’Asturies, pero ye que tamos obligaos a reciclar. Hai una directiva europea que va ser d’obligáu cumplimientu dientro d’unos meses que va ser: primer oxetivu, la reutilización, segundu, la reducción y terceru’l reciclaxe, y sólo’n cuartu llugar la incineración, o meyor dicho, la valorización, con un condicionante: siempre que nun tenga efeutos pal mediu ambiente o la salú. Y a continuación el vertederu.
Entos, si vamos tener qu’implementar los tres primeros puntos, resulta que pa la incineración va quedar mui poco, en consecuencia, tenemos que importalo.

Y quería volver sol tema de si hai sitiu o non, de si’l vertederu ta agotau o non, que ye lo que lleven diciendo dende hai diez y ocho años. Pero vamos ver, ye que hai que dexar sitiu pa les cenices y escombros. Y si hai un buen programa de reducción y reciclaxe, resulta que’l restu que va quedar del reciclaxe va ser menos del desfechu la incineradora, colo cual, dientro Serín ya ta reservada una zona del vertederu pa recoyer eses cenices.


Yolanda González
Cuando comenté lo del agotamientu’l vertederu, na fecha esta qu’ellos ponen del 2015, nun sé si se va agotar o non, pero quiero facer hincapié’n que llevamos un montón d’años paráos nos que nun se fizo absolutamente nada.
Y esa quietú, esa manera que nun facer les coses ye interesao. Y eso, políticamente tien que tener un coste. ¡Que llevamos diez años perdíos!.


José Antonio Ballesteros
Ye que además hai un plan de xestión que nun se cumplió. Y la directiva europea establez qu’ eso ye obligatorio. Y hai que cumplilo. Y marca unos oxetivos. Y si s’aprueba esa incineradora nun van poder cumplise.
Y tamos abocaos a una denuncia, bien seya por iniciativa propia, d’oficiu, o bien porque alguien lo denuncie, que denunciaremos, y va a haber un procedimientu d’incumplimientu contra’l Estáu Español.


Fructuoso Pontigo
Pero si ya hai varios procedimientos d’esos, por exemplu, pola contaminación atmosférica, y nun pasa nada. Hai poblaciones como’l casu de Mieres, o el casu de Xixón, o el casu d’Avilés, onde tamos fuera de norma tolos años y nun pasa nada. Y la comisión europea sanciona a España por incumplimientu y nun pasa nada.
Y pongo un exemplu, n’Avilés l’otru día enterámonos qu’ una empresa, que se llama Galvanizados Avilés, que ye la mayor planta d’Europa de galvanizados, la mayor, lleva cinco meses funcionando y nun tien estudiu d’impactu ambiental. Y esi estudiu tendría que determinar si esa empresa ye viable o non, y lleva cinco meses funcionando, y además ta’l Principau como sociu de la empresa.
Ye lo que pasa equí tolos díes.


José Antonio Ballesteros
Un númberu mui importante de les empreses n’Asturies tan funcionando sin autorización. Téngolo comprobao por una querella que llevo contra una multinacional, que nun llegaba l’espediente al xulgáu, nun llegaba, nun llegaba, hasta que después de casi un añu de tar reclamándolu, llegó cola autorización de la selmana anterior, y llebaba años funcionando.
Y nesti casu nun yera solo la llicencia municipal, yera una autorización del Principáu.
Y eso ta xeneralizáo n’Asturies.


Fructuoso Pontigo
Pero nun vayamos a confundir la llicencia municipal, al trámite ambiental que ye d’obligáu cumplimientu. Una empresa, antes de ponése, tien que pasar un expediente col estudiu d’impactu ambiental, y ehí tienen que da-y la validez. Y resulta que tan funcionando sin tener tovía nin iniciáu esi trámite.
Equí, nel tema del ambiente, nun se cumple la llei casi nunca. Y ta pasando tolos díes.

La incineradora nun tien pasao’l periodu d’información pública, y eso ye una vulneración de derechos. Y tenemos qu’agotar toles víes llegales. Ye lo que ta pasando cola regasificadora.


José Antonio Ballesteros
Una precisión sobre esto. Vamos ver, lo que diz el Convenio d’Aarhus, nun ye eso tampoco, lo que hai que sacar a información pública ye’l proyeutu, pero Aarhus ya esixe una participación temprana, dende antes de que haya nada decidío. Por exemplu, dende’l momentu que nos planteamos si facer una incineradora ya tien que haber unes consultes públiques, ya tien qu’haber un sondéu de la opinión, de los vecinos, d’ecoloxistes, d’Ayuntamientos, enfín, de tol mundu que pueda tar implicáu.Y eso ye una cosa que se ta obviando de manera xeneralizada, ye decir, la participación pública reduzse al trámite d’alegaciones una vez que’l proyeutu ta ellaboráu y ta fechu l’estudiu d’impautu ambiental. Y eses alegaciones contéstales la empresa y ya tá, resuelto, esi ye tol trámite d’información pública. Y contéstales la empresa, nin siquiera l’alministración qu’autoriza, la propia empresa interesada que promueve’l proyeutu. Y con eso dase por bono. Pero eso nun ye lo que diz Aarhus.

Esto téngolo denunciao alguna vez y, de momentu’l tribunal supremu nun lo entendió. Acabarán entendiéndolo, porque Aarhus supón un cambiu de mentalidá de lo que ye la democracia participativa, de lo que son los procedimientos públicos.


Yolanda González
Por non falar de los estudios d’impautu, que son un corta y pega.


Fructuoso Pontigo
Eso ye un coladeru. Cuéntovos una anécdota que me tién pasao con una cantera. Citen diez páxaros, dicen que nun hai dengún protexíu, y resulta que nueve d’ellos nunca se vieron n’España.

Y lo de la participación, hai unos díes llegónos una carta del defensor européu, onde nos devolvía una denuncia por falta cumplimientu del Principáu en cuanto a la transparencia informativa, d’una petición d’accesu a la información que-yos obliga, nun plazu de doce meses, a contestanos. Y tenemos ehí peticiones d’información con diez años sin responder. Y mándennos a la Procuradora. Pero ye que la Procuradora ye la hermana l’Alcaldesa. Y bueno, nosotros, corteses, coximos eses denuncies que mandamos a Europa, y mandámos-yosles a la Procuradora, ya veremos, pero qué voi decir, esto ye una trampada.


Yolanda González
¿Y por qué esi apueste tan grande pola incineradora? …Niégome a creer que ye porque’l xerente COGERSA lo vende mui bien. Esto ye una decisión que se tomó va tiempu. ¿Quién la tomó?¿Por qué?


Un asistente
Yo creo que la incineradora ye lo que meyor encaxa nel plan de xestión que ya esiste. La non xestión. Lleválo too a quemar.
Tienes allí los suelos, les instalaciones, les entraes y salíes de camiones…
Facer lo que nosotros proponemos, descentralizáo, disperso, planificao, implicando a los ayuntamientos…, pa eso hai que facer un esfuerzu, un esfuerzu que puede funcionar en un añu, nin siquiera diez. Pero esto nun requier ningún esfuerzu. Ye solo encargala, instalala ellí, y tolo demás funciona igual, los camiones tienen que dir al mesmu sitiu…, nun hai que mover nin un filu.


Otru asistente
Puede ser que’l fechu de descentralizar la xestión de residuos tamién implica que se perdiese’l control absolutu, y además hai munchos inteseses económicos, porque ye facer una obra de cuatrocientos millones d’euros, y tener un negociu pa nun sé cuantu tiempu, pa 25 años, que ye lo que van dar de xestión de financiación. Eso ye interesao. Llévase falando munchos años de reciclaxe n’Europa, y equí y les señales d’alarma son sólo pol acabáo del vertederu. Aunque nun seya verdá. Eso ye una decisión política. Alguien decide apostar por eso pa nun perder el control d’un elementu tan importante como puede ser SOGEPSA güei, que ye COGERSA. Son hermanos del mesmu control, que s’exerce concretamente dende la FSA [Federación Socialista Asturiana].


El asistente d’antes
Fíxate como ye lo de la cuestión política, ta’l mesmu xerente dende que se creó COGERSA, pero ya hubo cinco gobiernos y de distintos partíos políticos. Tien un contratu blindáu. Ye más barato tenélu que dexálu.


Fructuoso Pontigo
Efectivamente, los resíduos son un negociu, como ye un negociu’l agua, y tamos viendo agora les batalles pola privatización en tolos ayuntamientos. Son negocios que mueven muncha pasta.
De la que venía p’acá quedé flipáu coles instalaciones d’EMTUSA, y tamién vi les d’EMULSA, y claro, al final l’alministración y los sos tentáculos xeneren una cantidá de texíu, d’empléu… y tenemos creao un clientelismu… Porque vamos ver, ya nun tamos falando d’una inversión importante, que alguien va facéla, nin d’un negociu importante, que alguien va facélu, sinon que tamién tamos falando d’unos empleos, pocos, pero que alguien va tener, y ya verás como dellos son cares conocíes.
Decíame l’otru día un rapaz que ta na Fundación Metal, qu’ellí son más alministrativos qu’enseñantes, y los alministrativos son o ex-conceyales o ex-alcaldes del PSOE, que tan ellí xubiláos, toos col so despachín.
Paez una anéudota, pero sumando, sumando…

Y decimos que nun llegamos a, o nun supimos, convencer a la xente, pero hai que tener en cuenta les dificultaes que tenemos. El Comercio, por exemplu, nun publica nada contra la incineradora, pero nada. Nada, nada, nada. La Nueva España algo, ¿pero cuanto? y eso antes que taba’l PP en contra. Y los pocos artículos que salieron costaron sangre, sudor y llárimes, y en contra la opinión de los redactores, porque, según decíen, les nuestres fuentes nun yeren ‘cotejadas’, y en cambio les de COGERSA, son toes cotexaes, ¿nun m’entiendes?


Yolanda González
Sol tema los empleos, pienso que, políticamente, tamién podía interesar tirar polo otro. Vas crear más puestos de trabayu.


José Antonio Ballesteros
Pero ye qu’equí, la política nun esiste, lo que hai de política ye fútbol o equí hai tomate. Y ya tá. Cola televisión y col fútbol desactives tóo. Y nun hai debate políticu.
Yo falo con xente, con conocíos, y de la universidá, xente formada, con bonos puestos, n’alministración, na empresa y tal... y nun saben, nun saben qu’esiste esti debate. Ye que nun lleen nin el periódicu. Nun lo tienen visto nin nel periódicu.


Un asistente
Emilio Sastre fue conseyeru mediu ambiente, fue responsable de la universidá, de tolo que tenía que ver cola teunoloxía y la innovación, cuando s’empezó a esplicar equí’l procedimientu pa la autorización ambiental integrada, la escuela de química, de la universidá, organizó unes xornaes pa esplica-yos tou esti asuntu a los futuros téunicos de xestión industrial, hubo montones de ponencies, y tábamos discutiendo si les empreses tienen o non autorización ambiental integrada, y la esplicación d’Emilio Sastre fue: “el mayor problema ambiental que tien Asturies ye la so incapacidá política, y si tuviera mayor capacidá política, toes eses tonteríes de la protección ambiental integrada y toa esta mierda que nun val pa nada más que pa paralizar el progresu industrial d’esta comunidá podíemos echales abaxu y dexános en paz d’esta panda de chalaos d’ecoloxistes”.
Esto ye lo qu’espliquen a los futuros xestores ambientales de les empreses.


Tino Fernández
Coca, de la Facultá de Químiques, directamente decía que la Industria yera bona sí o sí, nun importaba l’efeutu que tuviera, y que nun entendía cómo había químicos que se dedicaben a pone-yos trabes a les industries, que yeren unos traidores a la cantidá de xente que diba a trabayar ehí.
Bueno, dexémoslo ehí.

Quería poner enriba la mesa dos coses que ya tocásteis de forma más o menos tanxencial.
Multen agora a España pol tema la polución ambiental. Los datos que tengo d’Asturies falen directamente de la zona central, y l’ochenta y tantos por cientu los asturianos tamos con una cantidá de polución atmosférica inadmisible, y eso teniendo’n cuenta que son datos d’un añu de producción industrial baxa. Y pese a eso la incineradora ta ehí.

Y otra cosa más, acaben de sacar los señores del PSOE la llei d’economía sostenible, y dicen esplícitamente: nun queremos más incineradores n’España.
¿Qué sentíu tien esto?


José Antonio Ballesteros
Lo primero, el fechu de que haya menos actividá industrial implique menos contaminación, nun ye necesariamente. Casualmente nel casu d’Asturies, lo que ta ocurriendo ye que ta apilándose tol carbón que se tá sacando, y eso llevanta partícules.

Una asistente
Y les empreses, cuando paren y arranquen, ¿nun contaminen más?


Un asistente
Sí, pero eso ta fuera, la llei diz que na tasa d’emisión d’una central térmica, la parada y l’arranque nun cuenten.


Fructuoso Pontigo
Son dos coses distintes. Les empreses asturianes, n’emisión, cumplen toes. Onde incumplen ye n’inmisión, que ye lo que miden les estaciones del Principáu.
O seya, en chimenea, toes tan cumpliendo, pero’l problema tenémoslu n’inmisión, les estaciones que miden la totalidá de la contaminación.
Y desgraciadamente eso nótase perfectamente. Esti añu fue un añu mui malu pa la industria. Por exemplo’n Llangreu, que tuvo la térmica parada, baxó la contaminación al cincuenta por cientu.

En Mieres, que nun paró la térmica de La Pereda, la contaminación caltúvose o aumentó. Y en Xixón baxaron toles estaciones menos la de La Calzada, ¿por qué?, porque fue l’añu mas gochu d’Arcelor, porque utilizó’l peor carbón del mundu, el más baratu del mercáu. Salíen fumarees de les chimenees, punximos varies denuncies, les antorches tol día prendíes, cuando sólo les prenden accidentalmente. Y les dos estaciones más cercanes, la de Xixón u la d’Avilés, disparáronse.
Los datos son claros y contundentes. Uvíeu, que tien munchos problemes cola central de Soto de Ribera, como nun funcionó la térmica, nun tuvo contaminación. La estación de Trubia ta más llimpia agora mesmo.

Siempre doi los datos y la xente quédase flipada. Asturies tien la mayor tasa d’enfermedaes oncolóxiques [de cáncer] de varones d’España. La mayor tasa.
Tenemos el nivel más altu de morbilidad ambiental [muertos por razones ambientales] d’España.
Tenemos el menor nivel d’esperanza de vida n’homes d’España. Y el segundu de muyeres.

Eso quier decir que tamos partiendo d’una realidá que ye ya horrorosa. Y si a eso vas sumar otres fuentes de contaminación, como la incineradora, que ye incontrolable, por más que diga Coca que nun xenera contaminación, que ye como fumar un cigarru.


Un asistente
Otru detalle ye’l tema del caltenimientu, y los filtros. ¿Eso de verdá va a controlase?


Una asistente
Hai tres empreses n’España que tienen la capacidá pa facer el control de los filtros, pero sal mui caro, colo que ninguna de les incineradores pasen esos controles.


Fructuoso Pontigo
Bueno, controles sí lleven. El problema ta’n que nun puedes facer el control de dioxines en contínuo. Tovía nun hai, agora mesmo un sistema homologáu. Y entós lo que se fai son muestres trimestrales.


José Antonio Ballesteros
Ya, con avisu previu a la empresa.


Fructuoso Pontigo
Bueno, nun lo sabemos, pero n’Asturies avisen: “oye, que va dir güei’l técnicu a medir”, colo cual la empresa sábelo.

Pero, n’España hai un casu, que sepamos, Valdemingómez, que puso una incineradoda hai once años, y cumplía la normativa, según la empresa. Tuvo una denuncia de Rivas Vaciamadrid, que ye un municipiu colindante que ta sistemáticamente en contra la incineradora, y la fiscalía tomó unes muestres, y daba mil veces más que lo que decía la empresa.

Pero además, el problema que hai con esto ye que los únicos que tienen capacidá pa medir ye’l Principáu. Y si tu denuncies, va’l guardia civil a tomar una muestra y el llaboratoriu que hai n’Asturies ye’l del Principáu, que ye’l mesmu que diz que non, que nun hai contaminantes, colo que tamos totalmente vendíos.
O seya, vixilar a les industries ye mui difícil, porque nun tenemos medios.


Un asistente
Siguiendo col problema del control de les emisiones, el problema que tenemos ye que tamos n’una comunidá mui contaminada y que hai ya munches emisiones de tou tipu, colo que va ser mui dificil medir la influencia directa que va tener una planta d’esti tipu.


José Antonio Ballesteros
Y si la xente nun entra polos temes de salú, sí va entrar polo que-yos va rascar el bolsu.
Nun vos alcordais d’aquel que dixo’n Corvera: “aquí tola vida tuvimos industria y nunca morrió nadie”. Pero lo que la xente va entender ye lo que-y va rascar el bolsu, aunque será d’equí a que té termidada la incineradora.
Y tamién, que tamos nuna crisis económica con más de cuatro millones de paraos, ochentaitantos mil n’Asturies, y eso nun crea empleu, o crea una cantidá ridícula, mientres que’l sistema de reciclaxe crea unos dos mil empleos.


Un asistente
Si hubiere un debate políticu de verdá, nel que alguna fuerza política punxera’l tema enriba la mesa, nel periódicu del día, na radio, eso faría qu’ empiece a haber una tensión que xenere un debate y una información. Pero nun la hai. Quitando a Gabino, qu’eso pa min yera más una comedia que otra cosa.
Pero Izquierda Unida, que podría d’alguna manera apretar un poco más pa xenerar una tensión política, nun lo fai. Sal güei una semeya, con mui mala intención, de Jesús Iglesias dándoi la mano a Buendía. Al fin y al cabu lo que saca Izquierda Unida ye que nun pasa nada, que tan en contra, pero que nadie s’esprecete porque’l pautu sigue.
Y cuando nun ye posible que se xenere una tensión porque nun hai una fuerza política que lo condicione, ye mui complicao. Ye mui complicao, por exemplu, que mi madre s’entere. Y acaba quedándose’l debate entre xente que ya ta mui enterao.


Fructuoso Pontigo
Hai un tema claru, el PSOE funciona toos a una. Ehí nun sal nin dios del tarru. Puen discutir d’uno y d’otro, pero van toos a una. Lo que-yos digan.
Y si nosotros supiéramos cómo movilizar a la xente nun taríamos equí, porque la xente ya taría convencida. Intentamos tocar, humildemente, dentro de les posibilidaes que teníamos, tolos frentes.
Lo d’Izquierda Unida paezme grave, Izquierda Unida y los dos socios, el Bloque y Los Verdes, eso ye una columpiada de la virxen, deciden rápidamente, en sin haber un comité executivu nin nada: “non, non, nosotros nun nos vamos”.


José Antonio Ballesteros
Pera, pera, oye, qu’Izquierda Unida ye Izquierda Unida, y Los Verdes somos Los Verdes.


Fructuoso Pontigo
Ya, pero yo creo qu’esto que dixo IU de seguir tenía que tener sío contestao polos otros. Nun sé lo que opinais, pero dicir: “non, mira, nosotros si s’aprueba vámonos, porque vamos ser co-responsables, aunque seya’n minoría, d’esa decisión”.

Pero al marxen d’eso, mirándolo’n clave electoral, el PSOE a un añu de les elecciones, unes elecciones mui complicaes, tamién pa los demás, pero pal PSOE más porque puede dexar de gobernar, y van dir munchos pal paro, que ye’l ‘modus vivendi’ de muncha xente, electoralmente tan faciéndolo mui bien.


Un asistente
¿Cómo ye que se fai esti tiberiu habiendo ellecciones xenerales?
Y por parte de la FSA y non del gobiernu asturianu.
La xugada planificada ye: “aventurámonos, machacámonos al Areces, enriba colocámonos nosotros meyor, y llueu, pase lo que pase, quien va perder va ser Izquierda Unida, tanto si se queda como si se va”.


Tino Fernández
Bueno, tengo que decivos una cosa, la tertulia tenía una duración aproximada d’una hora, y ya se nos fue la pinza. Y llueu, cuando se transcriba too esto, a partir de la páxina 20 o 30, cansa. Podemos seguir comentando si queréis, tomando una cervecina, pero tenemos que dar ya la tertulia por finalizada.


Fructuoso Pontigo
De toes maneres, antes de marchar, creo que hai munches coses que se pueden facer tovía, nun hai que tirar la toalla por nada. Además, hai esperiencies de sobra de batalles que se ganaron, peor qu’esta, y lo que hai que facer ye buscar cómo. Qu’esi ye’l problema. Cómo continuamos.

Primero, los que tamos contra la incineradora somos de diferentes ramales, y cada ún distintu, que ye un tema del que nun falamos, pero nun hai un solu movimientu contra la incineradora, hai varios, y nin siquiera tan coordinaos ente ellos. Y ye una pena que la poca enerxía que tenemos, enriba ta dispersándose. Y teníamos que ver cómo actuar ante esta realidá que tenemos.

Y yo creo qu'esi ye’l retu, cómo facelo, aprendiendo d’otros errores, y seguir batallando, en sin quemános pero dando la batalla. Aunque hai otres munches batalles a la vez, y claro, a toes nun se puede, pero ésta merez la pena por tolo que nos tamos xugando. Porque onde se pon una incineradora ya nun se quita, lo más fácil ye que llueu pongan otra mayor.