Tertulia: La primavera avanza. Presente y posibilidaes de l'agricultura ecolóxica

Resumen de la tertulia del 5 d’abril de2011
La primavera avanza.
Presente y posibilidaes de l'agricultura ecolóxica

Na que participaron

Alberto Buznego “Rizos”
Activista miembru de l’Asociación Picu Rabicu

Gustavo Forcelledo
Productor de quesos. Quesu de Varé

Aquilino González
Agricultor Ecolóxicu El Noceu


Presentador
Esta sesión de la Tertulia Pachín de Melás quisimos dedicala a l’agricultura ecolóxica, partiendo d’un llibru clásicu, “Primavera silenciosa”, de Rachel L. Carson editáu allá polos sesenta [Silent Spring 1960, reedición en Editorial Crítica 2005], del que me vais permitir que-vos llea unes llinies como introducción:

So crecientes estensiones d’Estaos Xuníos, llega agora la primavera en sin ser anunciada pol regresu de los páxaros, y los tempranos riscares tán estrañamente silenciosos ellí onde antes se llenaben de la guapura del canciu les aves. Esti silenciu repentín, esti tapecimientu del color, de la guapura y del interés que los páxaros confieren al nuestru mundu, tien venío a lo foíno, astutamente, y en sin ser notao.

Pa toos nosotros, tanto como pal raitán de Míchigan, o pal salmón del Miramichi, esti ye un problema d’ecoloxía, d’ interdependencia. Envelenamos a los mosquitos d’un ríu y los bancos de salmones queden afectaos y muerren. Envelenamos les larves de les mosques d’un llagu y la ponzoña pasa d’eslabón n’eslabón, pola cadena d’alimentos, y pronto conviértense en víctimes los páxaros de les orielles. Rociamos les nuestres llameres y les siguientes primaveres quédense silencioses, en sin el canciu de los raitanes, nun porque los tengamos rociao direutamente, si non porque’l velenu viaxó, pasu tres pasu, a traviés del cieclu constituyíu poles fueyes d’esi árbol, los merucos de tierra y el raitán que los come. Esos son casos rexistraos, fácilmente observables, que formen parte del mundu que nos arrodia. Reflexos del texíu de la vida –o de la muerte- que los científicos conocen como ecoloxía.

Atopámonos agora nuna encruciyada. Pero al aviesu de los caminos del poema de Robert Frost, dambos nun son igualmente guapos. El que tuvimos siguiendo ye d'una facilidá que deceiciona, una carretera de primerísimu orde pola que progresamos a gran velocidá, pero a que’l so fin ta'l desastre. La otra vuelta –el camín “menos frecuentau”- ofrez al final la nuestra única oportunidá p’algamar una meta qu’ asegure la conservación de la nuestra tierra.
Depués de too, la elección tenemos que facela nosotros. Si, depués de tener aguantao muncho, aseguramos el nuestru “derechu de saber” y si, sabiendo, llegamos a la conclusión de que se nos pide qu’aceptemos riesgos temibles y disparataos, nun debemos continuar siguiendo'l conseyu de los que nos dicen que llenemos el nuestru mundu de productos químicos velenosos; tenemos la obligación de mirar al nuestru alredor y ver qué otra sienda s’abre ante nós.

Y frente a esi envelenamientu sistemáticu que se fai na agricultura “convencional” descritu maxistralmente nesi llibru de la Primavera Silenciosa, quiximos poné-y a la nuestra tertulia “La primavera avanza”, y aprovechando la cita anterior al poeta Rober Frost, garramos nosotros, como símbolu d’esperanza, el poema d’Ángel González

        La vida en xuegu

Onde pongo la vida pongo'l fueu
de la mio pasión volcada y ensin salida.
Onde tengo l'amor, toco la ferida.
Onde pongo la fe, póngome en xuegu.
Pongo en xuegu la mio vida, y pierdo, y llueu
torno entamar, ensin vida, otra partida.
Perdida la d'ayeri, la de güei perdida,
nun me doi por vencíu, y sigo, y xuego
lo que me queda: un restu d'esperanza.
Al siempres va. Caltengo la mio postura.
Si sal nunca, la esperanza ye muerte.
Si sal amor, la primavera avanza.


Falamos d’esperanza, porque tamos viendo qu’equí n’Asturies ta medrando l’agricultura ecolóxica, y cada vez hai más productores y paez tamién que’l so consumu ta espoxigando.

Y pa falar d’ello tenemos a tres invitaos, Aquilino González, agricultor ecolóxicu de la finca El Noceu, equí cerca, en Sariegu, a Gustavo Forcelledo, que ye’l primer ellaborador de quesu ecolóxicu d’Asturies, el famosu Quesu de Varé, y a Alberto Buznego, al que tol mundu conoz como “Rizos”, que ye un activista, quiciavis el que más se ta moviendo agora mesmo nesti mundu de l'agroecoloxía y que pertenez a l’Asociación Picu Rabicu, y que va ser meyor que nos cuente él mesmu de qué va.

Ya sabéis, esta tertulia ta abierta y que toos, igual que los invitaos, toos podemos intervenir. Y p’alantre. Si quies entamar tu mesmu, Gustavo… venga, tienes la palabra.

Gustavo Forcelledo
Voi cuntavos la mio esperiencia col quesu. D’entrada, al ser los pioneros neso del quesu ecolóxicu, topabes col primer problema que yera esplica-y a la xente qué yera eso d’ecolóxico, porque sonaba mui artificial esi términu. Equí lo que tien munchu prestixu ye’l tema de lo de casa. Les coses caseres, de casa, tienen un valor añadíu mui grande. Pero respeutu a lo d’ecolóxico, taben fartucos de la propaganda de les grandes empreses, eso del bio-nun-se-qué, sonaba un poco a falso, y nun principiu hubo que dar munches esplicaciones pa informar a la xente.
Tamién hai más conciencia agora de l’alimentación. Hai munchos temes d’alerxes, de reacciones a productos químicos, y la xente entama agora a querer alimentase sano.

Aquilino González
Yo voi entamar por presentame. Vengo del movimientu obreru, principalmente na cuenca minera. Ellí, bono, vas implicándote y llueu vas enllazando col movimientu pacifista, aquello d’OTAN NON, ecoloxista, les campañes antinucleares… y too eso llévate a una toma de conciencia no que tamos. Y coincide que los padres de la muyer son agricultores y que teníamos ganes y les tierres y planteamos un proyeutu alternativu, que ye’l proyeutu Nocéu, de diversificación agroecolóxica sostenible, que plantea tamién ser una alternativa anticapitalista, pola forma de producir, de distribuir, y pol estilu de vida un poco tamién.
Y ellí planteamos cambiar el modelu de lo que ye l’agricultura tradicional, lo de tener vaques y cuatro coses, y diximos que necesitábamos ser autosuficientes na midida que podamos, y vimos que podíemos producir tou esti tipu d’hortaliza, tou esti tipu de fruta… tolo que podemos tener equí n’Asturies en sin forzar nada.
Somos conscientes que la industria agroalimentaria, conxuntamente cola industria enerxética, son les principales causantes del cambiu climáticu, del consumu de recursos ecolóxicos cada día más escasos y que tan agotándose, y eso ta propiciando que cada día haya más problemes, nun solo a nivel de mediu ambiente, si non a nivel de salú.
Pa poner el proyeutu en marcha vas implicándote en munches coses, como la semiente, recuperación de grana autóctono, trabayamos con una rede de semientes, y llueu trabayamos col SERIDA [SErviciu Rexonal d’Investigación y Desarrollu Agroalimentariu], porque queremos que los organismos oficiales, que tienen un dineru públicu, s’impliquen nestes coses.
Y tamién vamos faciendo trabayos d’investigación en temes de sidra, de frutos… porque hai munches variedaes perdíes, nun sé, más del ochenta por cientu de les semientes tan desaniciaies, y llueu, alcontramos que la manzana de mesa yera una manzana que tuvo trabayándose y tamién ta perdío. Pa poner la plantación de manzana que ficimos de diecisiete variedaes, tuvimos qu’esperar un añu, pa encargalo a los viveros. Porque nun hai demanda.
Hai demanda de sidra, eso ta trabayándose, hai ventidos variedaes de manzana de sidra.
Tamién queríamos diversificar nozales, pero tampoco hai investigación sobre eso.

Tamién tamos cola comercialización, ehí enseguida te cortexen les grandes superficies, como El Corte Inglés, pero ellos son los principales culpables de que güei l’agricultura te como te, entós plantegamos como alternativa la venta direuta, en sin intermediarios y a mui corta distancia. Tenemos una tiendina pa vender y tamién vendemos nel mercáu de Pola Siero los martes. Eso, al principiu costónos un poco de trabayu, porque nun lo conocíamos, pero siguimos aprendiendo. La comercialización nun ye fácil, tienes que dar muncha confianza a la xente, y dir con un productu bonu. Nun val dir con unes lechugues llenes de cascoxos. Bono, eso llega a los amigos ya eso, pero nosotros queríamos llegar a más xente. Home sí, había grupos de consumu, pero esos taben concienciaos ya, y quiximos entrar no que yeren les places de siempre, y qu’ellí, la xente normal pueda tamién conocer esto.
Quiximos apostar por eso tamién, y llevónos a facer alcuentros, nun sé, na época de los magüestos, cola disculpa de les castañes y la sidra dulce, poníamos cosines asina n’ecolóxico, y en mayu facíamos otru, y asina, y eso dio llugar a que la xente nos fuese conociendo y garrando confianza no que tábamos faciendo, y ellos mesmos foron tresmitiendo la voz de que funcionaba esto.
Y, agora mesmo tamos desbordaos, tenémoslo too vendío. Y hai xente que sigue viniendo a pidir coses, como una cooperativa de consumu d’Arriondes d’unes trenta persones, que quieren que-yos suministremos productos de temporada ecolóxicos durante tol añu. Yera un poco compromisu y pensamos n’aumentar, pero creemos que tenía qu’haber otra xente. Y coincide que Chupa-chups cierra y hai una pareya d’Infiestu, que tienen tamién tierres de los padres, y entamamos a trabayar con ellos.
Y ya-yos pasamos esti grupu pa que puedan trabayar pa ellos.
Y creo que cada día hai más demanda de productos ecolóxicos. Cada día la xente ta concienciándose más. Pero eso sí, hai que da-yos muncha confianza. Nun val: “güei nun vengo, pasao tampoco…”, tienes que ser seriu.
Y de los precios, plantegamos que nun foren precios pa ricos. Porque l’agricultura ecolóxica suena como pa ricos. Pero pa que l’agricultura ecolóxica seya una alternativa, tien que demandalo la sociedá, y pa eso, hai qu’axustar precios, pa que puedan llegar toos a ello y-yos vaiga gustando.
Y val ya, ya si eso siguimos llueu.


Alberto Buznego “Rizos”
Yo quería entamar por esto último que dicíes.
La gran diferencia entre los que ven na agricultura ecolóxica y el comerciu xustu, un nichu de negociu y los que vemos otra cosa ye si consideramos esto como una opción o como un derechu
Pa Picu Rabicu l’agricultura ecolóxica, el comerciu xustu, la soberanía alimentaria, son consideraos como métodos de llucha pa cambiar les coses. Nun son una opción, son un derechu.
Ye un derechu que tien que llegar a tola xente, nun ye una opción pal que se la pueda pagar. El comer sano, de calidá, calteniendo l’entornu, ye un derechu pa toos.
Nun tien problemes naide pa producir asina, nun tien problemes nin Carrefour nin Bayer. Bayer produz fitosanitarios ecolóxicos en sin dengún problema. La Dupont equí tamién lo viende en sin dengún problema. Ves los anuncios del Carrefour y tan mui preocupaos pol mediu ambiente, tienen yogures ecolóxicos y tan mui orgullosos.
Pero nun ye eso. Eso ye una parte. Eso tien un márketing y ye p’aquellos que quieren morrer un puquiñín más tarde y puen pagáselo.
Pero l’acceder a una alimentación de calidá hai que consideralo como un derechu ciudadanu. Porque, falando claro, l’alimentación a la qu’accede la xente ye una mierda. Ye una mercancía total y mala y… tósica.
Y equí enllazo colo que ye Picu Rabicu. Ye un colectivu de xente que veníemos de dellos movimientos sociales, fundamentalmente sindicales y d’insumisión, qu’entamamos a enrollanos cola comercialización d’alimentos xustos, al principiu había daqué d’artesanía, pero agora prácticamente ye too d’alimentos.
Un problema fundamental na comercialización de los alimentos ye’l de los intermediarios. Y nosotros intentamos averar, de la manera más direuta, los productores al consumidor. Bono, una tienda nun ye la manera más direuta, la manera más direuta ye la venta direuta, pero esto tamién hai que dir trabayándolo. Tenemos tamién un grupu de consumu, y ehí ye muncho más direuto, porque en realidá, la tienda nun intervien. Nun grupu de consumu, los agricultores lleven ellí los pidíos selmanales de la xente.

Pa nosotros lo llocal ye una prioridá cada vez mayor, anque casi toos venimos más bien del internacionalismu, lo llocal vémoslo como una necesidá clara, pero tampoco nun nos podemos escaecer de los países del sur, bono, falemos meyor de los países colonizaos, ye una definición meyor, porque lo del sur ye un accidente xeográficu y lo del tercer mundu ya ye patético, porque tenemos una responsabilidá con ellos, porque, querámoslo o non, nosotros somos parte de los colonizadores. Asina qu'agora, por mui interesante que seya lo llocal, llevamos varios sieglos imponiendo a aquella xente que cultive determinaes coses como p’agora dicir que lo güai ye nun tomar café porque vien de mui lloñe y nun ye ecolóxico.
Esto ye como un procesu, caun entama nun sitiu determináu y va recorriendo un camín, a vegaes los caminos van paralelos, a vegaes alcuéntreste nun sitiu, sepárteste, pero, básicamente nesa hestoria ye la que tamos, n’establecer canales de comercialización cada vez más direutos entre productores y consumidores, teniendo en cuenta qu’eso ye un derechu, intentando que los agricultores accedan a unos precios dignos.
Los canales de comercialización son un de los problemes fundamentales. Los canales que teníen los campesinos cortáronse casi toos, los mercaos, les places…, tan mui arrequexaos. Un datu, el setenta y cincu por cientu de los alimentos que consumimos n’Asturies viéndenlos cincu empreses. Quier dicir qu'al restu la humanidá quédanos el venti cincu por cientu. Y dientro d’eses cincu empreses nun ta El Arco, o El Árbol, colo qu'al final, los alimentos, fuera de lo que son les grandes superficies, son un cincu o un diez por cientu. Y ye ehí a onde puede acceder un artesanu o un productor ecolóxicu. Entós, la comercialización ye un cuellu de botella totalmente. Entre miles y miles de campesinos nel mundu, y millones de consumidores, ta too controlao por un grupu d’empreses.

Ye tar contra lo que podemos llamar la revolución verde. Nesi sentíu, nosotros definímosnos como contrarrevolucinarios. Porque la revolución verde ye la única revolución negativa que conozo na hestoria. La revolución verde nun tien nada que ver colo ecolóxico, tien que ver con tolo contrario. Dempués de la segunda guerra mundial intensifícase la industrialización de l'agricultura. Apaez la mecanización agraria, la biotecnoloxía… etc. Bono, agora, nes producciones agraries, fales casi en términos industriales. Ye dir contra esa industrialización de l'agricultura y de la transformación, porque eso tamién ye básico, tampoco podemos ver a los agricultores, a los campesinos y campesines, como productores de materies primes esclusivamente. Ye mui importante que participen tamién nesa transformación dalgún mou.
Y frutu tamién d’eso, llevamos como un par d'años no que ye la evolución lóxica, que ye metese na producción. Y tenemos una güerta y una pequeña, mui pequeña ganadería d’oveyes xaldes y tamos en procesu d’espansión, acabamos d’espandenos a otru conceyu. Bono, tenemos una pequeña esplotación colectiva y autoxestionada d’ocho persones, que nos xuntamos pa intentar meyorar la nuestra alimentación y la nuestra soberanía alimentania, llámase La Vecera.
Ye posible facelo, mui difícil, porque l’accesu a la tierra n’Asturies ye mui, mui difícil, pero ye posible. Nun hai falta montar Falcon Crest. Pues entamar con poco. Vas deprendiendo. Va llevándote a otros rollos…

Y tampoco nun ye fácil tornar a los métodos tradicionales d’esplotación. Ye mui difícil llegar al paisanu d’una cuadra, que costó lo que costó, nuna nave de la hostia, y dici-y: “non, lo que tienes que facer ye soltar les vaques pel prau”.
El ganaderu ye la persona que trabaya pa más xente, trabaya pa los bancos, pa los que vienden y arreglen tractores, pa los que faen piensos, pa los veterinarios, pa un montón de funcionarios… y too eso a base de trenta y tres céntimos el llitru llechi. Eso ye mui h.odío.

Vamos, los pilares fundamentales son, la soberanía alimentaria, el derechu de tolos pueblos a decidir sola so alimentación y a producir alimentos con calidá suficiente p’atender al so pueblu, y articular mecanismos de resistencia que seyan económicamente viables.
Bono, lo de que Picu Rabicu seya económicamente viable ya ye…, de momentu sí, sostenémonos, pero con munchu trabayu voluntariu, bono, voluntariu non, militante, nosotros somos militantes.

Un asistente
Comentabeis al principiu que lo faceis como lo de casa, o que les coses que son de casa son meyor valoraes. ¿Nun ye facer como realmente se fizo equí tola vida?¿Nun tais conectando col pasáu?


Gustavo Forcelledo
Sí, ye un poco la vuelta a la manera de trabayar d’antes, ye tornar a garrar la semiente propia…, pero eso tovía nun morrió.

Aquilino González
Nun morrió, pero agoniza.

Otru asistente
Amás, eso que te vienden por ehí de casa… la paisana sulfata los tomates en sin denguna conciencia de la dosis que ta echando, echa un puñáu… y ye de casa, de la güerta d'al llau, pero nun sabes qué ta faciendo esa paisana.
Y munches vegades esos productos tienen más peligru que los otros tovía.

Alberto Buznego “Rizos”
Sí, ves a la xente comprar velenos y dices… ¡madre mía!. Quieren matalo too. Y dicen…” non, si ye pa los mis ñetos”, bono, será que son unos pesaos.
Lo que pasa que llueu tamién los métodos de control y certificación tienen la so tela.

Un asistente
Nun toi na d’alcuerdo col tema de la certificación. Cola confianza d’un productor con un grupu de xente que lu conoza y sabe que lo ta faciendo perfectamente… nun tien por qué tar ehí en mediu’l COPAE [Conseyu de la Producción Agraria Ecolóxica del Principáu d’Asturies] nin dengún sellu.
Hai que buscar la venta direuta, creo yo.
Pagar pa que certifiquen que'l mi productu ye ecolóxicu…, nun lo veo.
Si, además de facer una venta direuta, invito a que conozcan la mi esplotación… nun tengo por qué tener una certificación.
Nun sé quien dixo eso de que'l sellu quedaba mui bien pa carrefour, … depende d'a onde quieras llegar.

Una asistente
Lo que pasa que, d’estes coses, hai de too. Hai xente qu’entramos por conciencia, y que lo tenemos superclaro, pero claro, siempre hai otra xente que nun entra igual… ¿entiéndesme?. Siempre tien qu’haber un pocu de control.
Porque yo toi nel Conseyu y veo qu’hai xente que vien porque hai un poco más de subvención.
Alcuérdome que coincidí con una señora na feria de Llanera, y vi qu’aquello, d’ecolóxico nada.
Hai xente a la que tienen que controlar un poco, porque si non, puede ser un fraude.

Otra asistente
Bono, yo soi universitaria, toi equí nel Campus de Viesques, y toi nuna asignatura que se llama Cooperación pal Desarrollu, y un de los proyeutos que tenemos que facer esti añu ye intentar modificar los Estatutos de la Universidá pa los “vending” y pa cafetería y tamién pa la fotocopiadora, ya introducir papel reciclau y productos de comerciu xustu, entre otres actividaes. Y sí que consuminos nos llocales d’Inxeniería en sin Fronteres café de comerciu xustu, y pa conseguilu, necesites que tenga un sellu, y eso acredita a que los beneficios repercutan en tola comunidá.


Alberto Buznego “Rizos”
Los sellos tienen una utilidá mui grande, que ye pa mandar cartes. Equí, n’Asturies nun hai grandes productores, pero pregúnta-yos pol sellu n’Andalucía, porque ellí, la duquesa d'Alba tien productos ecolóxicos.
Entós equí les discusiones son otres.
Nel casu del sellu de comerciu xustu, lo único que certifica esi sellu ye que'l preciu ta pagáu a tanto'l kilo. Hai un preciu xustu que s’establez con tolo que pueda suponer un preciu únicu del café pa tol mundu. Porque nun ye lo mesmo producir café de solombra en Nicaragua que café de plantación en Vietnam o n’Uganda y una cierta prefinanciación de la collecha y nun va muncho más allá. Mira que nun haya una esplotación mui evidente y eso.
Pero ye un sellu priváu, y claro, ye mui fácil, si yo cumplo eso, págenme más el productu, colo cual… hai denuncies de los cafecultores del Caribe diciendo que'l sellu ta comprando café a finqueros… entós lo de los sellos ye mui complexo.
Ye verdá qu’hai veces que puede ser una puerta d’entrada, pero los sellos hai que controlalos. Tienen que ser muncho más participativos. Nun puede ser que símplemente cuatro se xunten y marquen. Nosotros somos mui críticos colos sellos.
Nosotros nun trabayamos col sellu FLO [Fairtrade Labeling Organizations], nosotros nun lo vendemos… porque ya lo viende'l Carrefour, ye que suena hasta mal, ya suena a comercial.
Lo de los sellos tien una utilidá fundamental, que ye que, nuna estantería, un consumidor que nun sepa, identifique un productu. Nuna tienda, nuna venta directa, nun necesita un sellu. Un grupu de consumu nun necesita un sellu.

Una asistente
Yo tamién toi nun grupu de consumu, y sí, básicamente compramos coses, como les d’agricultura ecolóxica, que nun necesiten sellu, pero pa ciertes coses que vienen de lloñe, necesítase algo.
Y anque solo seya por concienciación, ye bono pa que la xente d’equí lo demande, y qu’esixa más precisión nos sellos.


Alberto Buznego “Rizos”
Voi dicite una cosa sol sellu FLO que yo creo que ye suficientemente esclarecedora: Nestlé tien un café de comerciu xustu selláu por FLO, y si Nestlé tien un café de comerciu xustu, esi sellu ye una mierda.
Nosotros taríamos d’alcuerdo con un sellu que certificara a la organización, non al productu. Y nel casu de los agricultores ecolóxicos tamién, certificar al agricultor, non al productu. Certificar a un métodu de facer, a unes maneres. Pero eso, a ver cómo lo certifiques, ye mui complexo.

Entós la confianza ye muncho más importante que'l sellu. Pero’l negociu, polo que tira ye pol sellu. Y claro, pa un agricultor, dicir “yo paso del sellu”, tamién ye complicao. Ye lo de siempre, al final, los agricultores tan siempre pillaos por tolos caprichos de les multinacionales, de los intermediarios, de los consumidores…


Aquilino González
A ver, yo equí tengo munches dudes, pero hai una cosa que tengo clara, hai varios tipos d’agricultura ecolóxica, hai una agricultura ecolóxica que pa min ta bien fecha, que ye un poco marxinal pero que ye una alternativa posible y bona, hai otru tipu d’agricultura, que ye pola que se ta apostando n’Europa que ye la que yo llamo de les grandes superficies y del gran capital, y ye símplemente facer una agricultura ecolóxica pero productiva a tope, qu’entra nes grandes superficies y tien sellu y una normativa europea, y eso ya ta ehí, funcionando, y tenemos por exemplu ya a la DuPont faciendo productos ecolóxicos, y hai una tercera agricultura, que ye la que planteamos nosotros, que ye más de fondu, que ye nun solo cambiar el tema del abonu, del cuchu, si non que lleva tamién una diversificación, rotación de cultivos, recuperación de grana…

Y cuando nos planteamos esto diximos “nun queremos entrar na mesma industria capitalista que nos va producir los abonos y lo demás", si non que planteamos alternatives a eso, lo que nun ye fácil, porque tamién queríamos apostar por llegar mayoritariamente a la población.
Y la normativa europea, dientro de lo malo, ye lo más seguro qu'hai pal consumidor, nel sentíu que controla más rigurosamente que denguna otra, col sellu, con inspecciones…, porque nun tamos nuna sociedá perfeuta, concienciada, … hai dudes, hai especulación, nun toos lo facemos en conciencia, eso nun esiste, y mientres que nun esista, pa min, tien qu’haber algún sistema de control.
Porque yo nun sólo quiero llegar a la xente cola que tengo confianza, quiero llegar a la xente que nun conozo de nada, y a esos, ¿cómo-yos certifico los productos?.
Hai una xente que consume productos ecolóxicos por conciencia, hai otra xente que ye por salú, y hai otra xente que ye por moda, a esos, igual que los ves venir, veslos marchar, eso funciona asina, porque’l sistema funciona asina.
Y entos, dientro les contradicciones, mientres eso seya asina, eso ye lo menos malo, necesitamos esa normativa pa, de momentu, siguir funcionando.
Anque tenemos que siguir con esti debate pa dir reflexonando, pa dir viendo otros mecanismos, pero hai que dar seguridá a la xente.

Y, por exemplu, en Sariegu, hai vecinos que dicen: “la carne ta en crisis, nun viendo bien la carne convencional, pero la ecolóxica tien subvención y viéndese meyor, porque hai campañes y ayudes”, y della xente, en sin conciencia denguna, métese a producir carne ecolóxica, pero dicen: “hostia, el piensu ecolóxicu que traigo cuéstame más”, porque quieras o non, l’agricultura ecolóxica va ser siempre más costosa, porque esi esfuerzu tenemos que facelu, porque tamos cuidando'l mediu ambiente, tamos cuidando la salú, y tamos creando puestos de trabayu, y esi ganaderu del exemplu diz: “si equí naide me ve, meto piensu del convencional, que me sal muncho más baratu, y viendo’l xatu polo ecolóxico”, y asina lo fai, y vien una inspección, mira l'asuntu y ve que nun gasta dengún piensu, y salen tantos quilos de carne… ¿cómo ye esto?, y abre la cuadra, y al paisanu faltó-y la escopeta pa echalos a tiros. Y va él y denúncialos porque-y entren na so finca a facer una inspección, y que lu roben encima, y tuvieron xuiciu, y pa echalu costó trabayu.
Entós claro, si nun hai tovía una conciencia na sociedá, a nivel del productor y del consumidor…, necesitamos mecanismos llegales y que funcionen y que seyan bien vistos.
Y pa min, tolos controles qu’haya…, que me vengan a controlar la sidra, que me vengan a controlar el tomate…, ta bien, ye más, esixo que me vengan, y que fagan tolos estudios que tengan que facer.

Un asistente
Yo crieme nuna d’eses güertes tan “ecolóxiques”, nes que se sulfataba tanto qu’había más sulfatu que tomate. Y además, vendíamoslo a un supermercáu del que se puede dicir el nome porque ya cerró, Oblanca, y nun sé cómo nun matamos a daquién. D’aquella Babosil vilo echar por kilos, y toos tan felices, nun pasaba nada. Y llueu, na mio vida llaboral, tocóme trabayar en control de calidá de sellos alimentarios. Y equí veo una doble moral. Por un llau, si nun te quies adaptar a les nueves tecnoloxíes y quies tar con temes artesanales, ye prácticamente imposible que'l proyeutu seya viable económicamente y que llegue a la xente que nun tenga una capacidá económica alta, porque los precios son mui altos.
Pero por otru llau, al final, un sellu de calidá son una serie de parámetros, y por definición, esa serie de parámetros son trampeables. Eso ta clarísimo, porque durante dos años dediquéme a facer trampes, porque la mio empresa dedicábase a eso, y si nun lo facía, echábenme.
O seya, eso trampéase. Y esa empresa certificadora suel ser, con tola probabilidá, privada. Yo nun conozo denguna empresa certificadora grande que seya pública.


Alberto Buznego “Rizos”
El COPAE n’Asturies ye públicu. Y esiste una gran producción con sellu regulador. Pero n’Andalucía, la certificadora ye privada. Y equí ye pública porque nun hai pal asuntu, pero nel momentu que lo puedan privatizar van dir por ehí.
Pero eses aparentes contradicciones nun son tales, son puntos de vista, él ta viéndolo de la manera del agricultor y yo toi viéndolo dende’l puntu de vista de la xente que facemos más llucha política. Nosotros somos mui ríxidos con determinaos principios políticos y éticos, pero somos mui poco ríxidos colos campesinos, porque ya ye tol mundu ríxidu con ellos.
Y claro, topes con grupos de consumu que dicen. “non, yo, a esti nun-y compro porque vendió pa les cestes del corte inglés”, pero dígo-y yo, “coño, pero si tu acabes de venir nun renault, echasti gasolina en repsol, pages-y la factura a iberdrola…”.
O seya, habrá qu’establecer otra serie de parámetros, porque ye qu'él vive d’eso, y si tu nun-y puedes garantizar unos ingresos…
Algunos grupos de consumu tienen abrasaos a criterios a los campesinos, pero llueu preguntes-yos, “pero vosotros café… ¿con qué criteriu lu mercais?”, “non, non, nosotros café non, que vien de mui lloñe”, “pero’l debate nun ye si se viende o nun se viende, ye si lo tomáis o nun lo tomáis”, porque, claro, tómenlo, pero ¿onde lo merquen?¿en carrefour?¿y esi ye un criteriu pa un grupu de consumu? Eso ye escaquease del problema.
Nosotros lo que tamos diciendo ye que'l campesín tien que manexase nel terrén de xuegu qu’hai, pero polo menos hai que tener claro que los sellos tienen unos llímites, y nun son la garantía p’algamar l'agricultura ecolóxica que queremos, pero ye un instrumentu que ta ehí y puede usáse… o non.

Un asistente
Ye un poco como si yo, por exemplu, agora, póngome a producir en sin conocer a xente, pero llueu, ya cuando conoza y tenga la mio producción vendía, puedo dicir que me doi de baxa nel COPAE, porque ya sabéis como trabayo y esto ye lo qu’hai.

Alberto Buznego “Rizos”
Y los grupos de consumu tienen los sos llímites. Too tien el so llímite. Porque de lo que tamos falando ye d’un cambiu mui grande. Pero bono, hai instrumentos, y caún tendrá que dir usándolos, pero hai que ser conscientes de los llímites d’esos instrumentos. Y en dellos casos tan apaeciendo problemes precisamente pol usu d’esos instrumentos.
Nosotros dicimos que los sellos tienen que se transformar, que la comercialización d’alimentos nun pue ser un negociu, tien qu’haber una ética social, tamos falando de la salú de la xente.


Aquilino González
Una de les coses que planteamos nosotros ye llegar a otra xente, nun sólo a esa xente que ya ta mui concienciada, y eso ye más complicao. Queremos llegar a onde te tol mundu, a esa plaza, y que la xente sepia lo que ye un productu ecolóxicu, porque pa min, esa xente ye la ferramienta principal, porque son ellos los que lo tienen que demandar, y son la mayoría, nun somos nosotros, y queremos llegar a esa mayoría. Y tenemos que dar una garantía, en too. Y nel COPAE, tenemos que pagar por too, y eso sube, pagamos por güerta y pagamos por transformaos.
Y si tengo confianza con xente que ya ta concienciada, digo-yos: “la sidra ecolóxica, con etiqueta val tanto, sin etiqueta val dos euros menos”, digo-yoslo a ellos, y nun lo pago al COPAE, y amás trabayamos menos porque nun tengo que colocar la etiqueta, ya inclusu ye un aforru enerxéticu'l nun ponéla, …quitála, volver a llavar…
Y el que me conoz, que conoz la mio casa, sabe que nun lu toi engañando, doilo a elexir, y la sidra ye la mesma. Nesa confianza ye lo que trabayamos. Pero nun-y lo viendas a un paisanu que vien de nun sé onde y que te diz que quier sidra ecolóxica. Nun te conoz, nun confía…

Y llueu hai otro. Cuando tamos plantegando una agricultura ecolóxica nun tan industrializada, más artesanal, más pequeña, más familiar, alcontrámonos con munches dificultaes. Una ye la transformación y la comercialización.
Cuando vamos a tranformar sidra, dícente que tienes que poner que contién sulfitos, y eso danlo pa tol mundu, pero yo nun meto sulfitos.
Y el vinagre, quiero llegalizalo, con rexistru sanitariu y con too porque, pa min, toi faciéndolo bien, pero non, dícente que non, que tengo qu’entrar na industria del vinagre, cuando toi faciendo venti llitros a la selmana, y na industria del vinagre tengo que pagar lo que ye imposible. Tien que pagar igual el que produz un millón de llitros de vinagre que’l que produz venti llitros de vinagre.
Y ehí tenemos otra llucha cola alministración. Hai que regular mecanismos pa que los pequeños agricultores puedan transformar en pequeño y vender direutamente, d’ una manera cenciella, y en sin esos costos, y que si queremos, que tengamos inspecciones en riegla.

Alberto Buznego “Rizos”
Eso, en Francia y n’Austria, que ya tan mui metíos nello, les normatives tienenles adaptaes. En Francia hai un rexistru sanitariu artesanal.
Esi ye un de los plantegamientos que llevamos defendiendo p’Asturies como daqué necesario.
Porque lo primero ye ya'l conceutu de quien pon lo del apellíu, porque l’apellíu siempre lu ponemos nosotros: ye artesano, ecolóxico… pero nun dicen de lo otro que ye industrial, químico… o lo que seya.
Y lo artesano… por exemplu, colos requisitos del rexistru sanitariu'l Gamonéu nun se puede facer. Eso de facer quesu nuna cabaña nel monte, en sin lluz nin agua nin na…. Y eso que montaron agora ye un paripé, porque ellí nun fai naide’l quesu. Van catar coles garrafes de “La Giralda”… y eso ye lo qu’hai.
Pero siendo serios, porque hai que ser seriu, lo que digo, en Francia hai un rexistru sanitariu artesanu, y n’Austria tamién, y eso permite facer delles coses.

Conozo a un rapaz, Cristian, que taba faciendo una envasadora de miel. Y esixíen-y lo mesmo a él qu'a la “Granja San Francisco”, y non, el tamañu yera distintu. Y decíen-y: “non, tien que tener bañu d’homes y de muyeres”…, y tien la so casa al llau.
Y hai coses que… y dependes del funcionariu de turnu, del veterinariu…, y hai que poner duches y yacusi pa los trabayadores que nun vas tener… pa envasar cien kilos de miel a la selmana.
Y eso ye lo aneudótico, pero’l rexistru sanitariu ye mui importante pa los artesanos.
Y tamién tan los canales de comercialización, porque con esi rexistru sanitariu puede comercializar direuta ya indireutamente, porque un campesín, na so casa, puede vender lo que quiera, pero a tres metros ya non. Y en Francia tamién hai un marxen de kilómetros de comercialización direuta, y bono, too eso son coses práctiques que tan ehí y que se pueden facer.

Un asistente
Tengo una última entruga. Faciendo un poco d’abogáu del diablu, antes comentábais que queríais llegar a muncha xente, pero realmente, en sin facer una producción industrial, ¿puede llegase a tol mundu? Por exemplu, les pites eses que tan tola so vida nunes xaules pequeñes y que-yos corten el picu, dicen que ye pa qu’haya güevos baratos pa tol mundu. Entós, ¿podría llegar a ser l’agricultura ecolóxica realmente alternativa?


Aquilino González
Ye un tema mui complicáu y ta enllenu de contradicciones. Soi de los qu’apuesten por una agricultura que seya alternativa y que llegue a la mayoría del mundu. Y hai xente como Rose Reisman y otros que tienen estudiao y demostrao que cola producción ecolóxica puede llegase igual que cola convencional o inclusu meyor.
Tuvi hai poco nuna charla sol llibru “Asturias Agropolitana”, de Jaime Izquierdo, que plantea que n’Asturies ande les poblaciones son pequeñes podríen facese munchos güertos alredor. Y amás agora que se ta planteando lo del aforru enerxéticu, podríen plantegase cantidá de soluciones p’aprovechar esos terrenos. Y eso tamién evitaría especulaciones urbanístiques. Y muncha xente podría dedicase a l'agricultura y relativamente cerca.

Otra cosa, si vos dais cuenta, l’añu pasáu hubo unes foles de calor con munchos incendios en Rusia, y perdiéronse más del cincuenta por cientu les colleches. Eso, fecho quiciavis pol cambiu climáticu, ta produciendo problemes mui graves na agricultura industrializada, pero nun tanto na ecolóxica, porque la grana ecolóxica ta más adaptada, tien más capacidá p’aguantar problemes y crisis. Y amás tamos contribuyendo a frenar esi cambiu climáticu. Ye l'agricultura industrial la que ta alimentando esi cambiu climáticu y la crisis ecolóxica.
Y toes estes revueltes o revoluciones d’Exiptu, de Túnez, salten precísamente porqué ellí, principalmente l’alimentu vien de Rusia, y coles pérdides de colleches, subieron los precios enormemente. Triplicose’l preciu de la barra de pan. Nun podíen comprar el pan.

Y lo de los gochos contaminaos n’Alemaña, la información que te dan nun te diz nada. Pero investigando, ves que de los desfechos de los biocombustibles de Brasil, de México o de nun sé onde, lo que ya nun sirve pa los coches, métenlo pa los piensos de les industries de los gochos esos. Y too eso ta supercontaminao bestialmente de yerbicides y de pesticides, y eso trai consecuencies.

Nun podemos dicir allegremente que somos una alternativa a l’alimentación industrializada, pero sí queremos apostar por ello. Y nun va ser fácil. Y en sin un sofitu por parte l’alministración, nun se va poder. Nun pue ser cosa namás de cuatro chiflaos.
Porque la idega esa de Jaime Izquierdo ye mui guapa, facer güertos, crear cientu cincuenta mil puestos de trabayu nes zones rurales, pa da-yos vida, cultura…pero ¿y les tierres? ¿En manes que quien tan? Too eso hai que cambialo.
Y por eso ye mui importante que’l consumidor, la población, tome conciencia del tema y que reivindique la necesidá d’esa agricultura. Porque l’alministración, nel momentu qu’haya presión, tien que cambiar el chip. Si hai muncha presión social, que nun l'hai tovía, tamos empezando, l’alministración tien que comprometese y dai otru enfoque a los territorios.

Un asistente
Pero eso nun ye lo que se fai na Xunión Europea. Si Alemaña tien una superproducción d’azúcar, pa que’l productor nun pierda dineru, ta mandando l’azúcar subvencionao a un país del tercer mundu, que nun ta dexando que lo produzcan ellí, porque nun pueden competir con esi productor que ta primáu, ta subvencionau.


Alberto Buznego “Rizos”
Pera, pera, la política de subvenciones de la Xunión Europea ye muncho más complicada que too eso. L’ochenta por cientu del dineru recíbenlo'l venti por cientu de los productores. Y nun confundamos productores con campesinos. La política de la Xunión Europea ye mui mala pa los campesinos del sur y pa los campesinos del norte.
Ye precisamente la política de subvenciones de la Xunión Europea y de los Estaos Xuníos lo que ta llevando a la ruina a los campesinos, a toos, a los del sur y a los del norte.

Hai un mitu que ye que too esto de la biotecnoloxía, la industrialización de l’agricultura, ye p’alimentar el mundu, que ye necesario, pero ye mentira. Ye absolutamente falso. La producción d’alimentos creció más que la población nos últimos trenta años, y cada vez hai más xente que pasa fame.
O seya, ye un problema de distribución, de repartu. Ye un problema de xusticia social. Nun ye un problema de producción.

Equí n’Asturies nunca hubo tan pocos campesinos y tan poca producción agraria. Esti añu ye l'añu onde menos producción agraria hai.

Un asistente
Y cuanto más s’especule cola tierra peor.

Alberto Buznego “Rizos”
Y lo que diz Aquilino. Al final hai que tener cambios políticos. Porque toes estes lluches individuales, lo importante ye que vayan convirtiendose en colectives y que vayan puxando a la gueta d’un cambiu políticu.

Aquilino González
Un datu, Haití, hai venti años o menos, yera autosuficiente prácticamente.Teníen arroz, azúcar, munches coses. La mayoría yeren agricultores que vivíen d’eso. Y cuando Carter y el Fondu Monetariu alcuerden introducir toos esos productos, miles d’agricultores tuvieron qu’afuxir, emigrar a los grandes suburbios de les ciudaes a mendigar y a morrer de fame ellí.

Güei sábese más que nunca qu'a los agricultores pequeños del mal llamáu tercer mundu tiénenlos morriendo de fame por polítiques internacionales d’esti tipu.
Entos, sí fai falta ayudar, pero dando ferramientes pa que puedan tener autonomía, llibertá. Porque si non tan dependiendo.
Y na India, una de les producciones de llechi mayores del mundu, la Nestlé introduz llechi supersubvencionada de los escedentes de llechi qu’hai n’Europa.
Y la llechi ellí, que yera’l sostén de millones de xente que vivía d’eso, con esos precios tan baxos, fai que se muerran millones y millones de vaques y millones d’indios probes tienen que marchar a sobrevivir o morrer de fame. Y agora la llechi… una vez fecho eso…, el que nun tenga perres a tomar pol sacu.
Eso ye lo que ta pasando cola política industrializada agroalimentaria.
Esto nun puede ser asina. L’agricultura ecolóxica tien que llevar consigo tamién unos plantegamientos éticos, morales, de xusticia social.
Eso ye lo que queremos. Y que llegue a una mayoría. Pero pa llegar a eso, tamos en pañales tovía.