Aportación d'Antonio García de Decrecimientu n'Asturies

Aportaciones d'Antonio García

de Decrecimientu m'Asturies]

23 de mayu de 2012


1ª aportación

A la de planteganos les alternatives al capitalismu al mundu actual ye importante tener en cuenta la realidá que pretendemos tresformar y tamién los escenarios futuros onde estes alternatives tienen d'encaxar.

Asturies tien una realidá que s'atopa inxerida nun mundu global; el futuru d'Asturies ta incluyíu dientru del futuru del planeta.

A lo llargo de les últimes décades n'Asturies fuimos incluyíos nel mundu desarrolláu y modernu y pa ello embarquemos en grandes obres ya infraestructures como'l Puertu deportivu les sableres artificiales, l'acuariu, el superpuertu, la regasificadora, tamién la construcción d'autovíes, rondes, carreteres, el metrotrén, l'hinchente de grandes superficies comerciales, la construcción incesante de viviendes, la renovación del parque d'automóviles privaos, etc…

Una esplosión d'infraestructures que, yera de suponer, traeríen a la rexón la prosperidá, y el progresu d'una rexón siempres sumida nun atrasu secular onde s'esaniciaron los sectores primariu y secundariu como l'agricultura, la ganadería, la minería, la siderurxa, la industria naval...

Entraríamos entós nel sector terciariu por aciu la industria turístico y la tecnoloxía y asina apostóse polos hoteles, los restoranes y los distintos eventos que nos pondríen nel llugar que merecíamos nesti mundu global.

Toa esta 'fiesta' foi pagada por aciu el creitu, esto ye, la obra faise pero tien de pagase con dineru qu'empresten les entidaes bancaries, que darréu habría que devolver; enxertámonos asina nuna crisis financiera global.

Esta crisis financiera sí ye visible nos medios de comunicación, pero esisten crisis ocultes que nun plantegen nengún problema al sistema capitalista.

Pero tou xorrecimientu económicu, lleva apareyáu'l consumu d'enerxía y materiales (la desmaterialización de la economía nun dexa de ser una falacia), y el fluxu enerxéticu que tien menesterla economía pa crecer tien unes llendes físiques; una vegada llegáu a estes llendes la crecedera ye imposible y llegamos a una crisis enerxética.

Con esti planteamientu llegamos a la conclusión de que la crecedera infinita nun mundu finitu ye imposible.

Toa esta construcción d'infraestructures provoca una crisis ecolóxica como la perda de la biodiversidá, la destrucción de los ecosistemes, o'l cambéu climáticu…

Como tampoco hai dineru pa invertir (porque tien que pagase la delda acumulada) cáusase una crisis económica y el modelu productivu párase, (fai falta enerxía y materiales que resulten cada vez más difíciles de consiguir).

Ante'l fechu de que la locomotora económica se para, imponse dende'l poder l'austeridá, niciando una crisis social; los tiempos cuando'l dineru circulaba termináronse y el paru y el empobrecimientu de les persones entama a ser xeneralizáu.

La corrupción política ya institucional sale a la lluz, y la llexitimidá del sistema monárquicu parllamentariu provoca una crisis política.

Ábrese tamién una crisis cultural: los espertos fálennos colos númberos, los informes, les estadístiques …; pero esto nun ye abondu pa esplicar el mundu en que vivimos, la civilización occidental dexa de tener sentíu unívocu (progresu, desenvolvimientu, crecedera, bientar, prosperidá…) y ábrense nuevos caminos; redefínense conceutos, y apaecen nueves siendes pa transitar.


2ª aportación

El crecimientu económicu de la economía sofitábase en tres pegollos:

La depredación de recursos de la Naturaleza, por aciu les industries extractivas principalmente nos países aprobetaos; esta riqueza tresvásase a los países arriquecíos por aciu los sistemes financieros.

La esplotación de los seres humanos, por aciu los mecanismos de dominación y la esplotación de les persones.

La enayenación del trabayu de curiaos a les muyeres; les persones somos fráxiles y vulnerables y precisamos de los demás pa vivir; toles persones tenemos de ser curiaes especialmente cuando somos neños, cuando tamos enfermos o cuando nos faemos mayores; nesta crisis munchos homes tán perdiendo'l trabayu pero nun asumen les xeres de curiau que siguen llevando a cabu les muyeres que s'incorporen a puestos de trabayu de baxa remuneración y al empar siguen faciendo les xeres que trai curiar de la familia.


3ª aportación

Cuando faemos la entruga de ¿Qué faer? ¿Qué alternatives plantegamos frente al capitalismu?
Lo primeru que debemos camudar ye la nuesa forma de pensar; nun mundu onde prima l'ésitu, el beneficiu económicu, el consumismu, l'individualismu, la fuerza de los poderosos; les persones como seres fráxiles y vulnerables precisamos venceyanos por aciu el sofitu mutuu, la convivencia y l'allegría de vivir; tenemos de ser muyeres y homes axentes tresformadores d'esta nueva realidá necesaria pa la pervivencia de lo humano.

Dende les instituciones y organismos del Estáu tendría d'impulsase:

El repartu del trabayu non remunerau, retraer recursos del capital por aciu la reforma fiscal, la espropiación de la propiedá, la recalificación del suelu, la prohibición del ánimu d'arriquecimientu, l'amenorgamientu de la xornada llaboral, los recursos pa salú, la educación, les pensiones y los curiaos.

Dende nós:

Afayar la cenciellez voluntaria, la riqueza nel xorrecimientu de les relaciones sociales de convivencia, na frugalidá, la sobriedá, la simplicidá, ye dicir con cierta mesura de consumu material; pero ensin llimitaciones nel consumu de sentimientos, vida allegre y el bon vivir.

Actuar dende l'autoxestión colectiva. por aciu el desendolcu d'iniciatives d'organización comunal a nivel llocal como les ciudaes de transición, les cooperatives integrales, el movimientu llentu, la permacultura, el desenvolvimientu de la soberanía alimentaria y la agroecología, les ecoaldees, los bancos de tierres, la okupación y recuperación d'edificios y viviendes vacíos, la banca ética, los movimientos de llucha contra les grandes obres, el sindicalismu autoxestionariu y los modelos de repartu de trabayu, les iniciatives de renta básica y techu d'ingresos, los grupos d'insolventes, l'usu del tresporte colectivu y compartíu, la repoblación rural y el repartu de tierres, la rellocalización agraria, l'autoconstrucción ecolóxica y l'arquitectura sostenible, güertos a comuña, les asociaciones de salú integral, partu, lactancia y crianza natural, les comunidaes de conocencia llibre, prensa llibre, educación llibre, comunidá llibre, les redes de trueque, bancos d'hores, mercaos llocales, los movimientos de desobediencia fiscal y desobediencia civil, les cooperatives autoxestionaes de producción y consumu, d'enerxíes anovables, les redes d'intercambiu, les monedes sociales…

Formes de vida alternativa qu'en dómina de crisis puede ser una posibilidá de supervivencia. Y la base territorial y enerxético pa otru modelu social.

Crear un proyectu d'acción política de nonviolencia, voluntariu, d'emancipación ideolóxica y superación de la idea de progresu, que pon en valor los bienes comunes y relacionales, de los curiaos, de la cooperación, reciprocidá, mutualidá y multiculturalidá; asumiendo les llendes biofísiques de la Tierra, menguando los fluxos d'enerxía y materia utilizaos nos procesos granibles y ciclos de consumu.