Industria cultural asturiana +IVA
del 25 de setiembre de 2012
ESPECTÁCULU Y ENTRETENIMIENTU
30/10/2012
guirriuanton
Apocayá lleíamos en prensa una barbaridá más de les munches a les que nos tienen avezaos últimamente dellos mal llamaos políticos, referida a la xubida del IVA pal sector del espectáculu. Un altu funcionariu de Facienda suxería estremar l'"espectáculu” del "entretenimientu” pa xustificar esta midida. Lóxicamente, la babayez foi retrucada contundentemente pol maltratáu sector.
Los gobiernos tienen la obligación de garantizar el derechu del accesu a la cultura de los y les ciudadanes, y xixilar del so correctu espardimientu. Depués vien la forma en que los gobiernos desenvuelven política cultural. En Asturies, el gobiernu d'Areces –y anteriores– desenvuelven un modelu cultural basáu nel atractivu turísticu. Pa ello, creen espacios de rellumón como la Llaboral o'l Niemeyer, p'allugar propuestes artístiques, de gran repercusión, o bien elitistes, pero casi siempres importaes. Institucionalmente, xunióse, Turismu y Cultura nuna viceconseyería, y ponse en marcha la entidá de xestión RECREA, con un equipu que venía de la Sociedá Rexonal de Turismu. Más allá d'aldericar si foi un exemplu de cosmopaletismu acomplexáu, o de revisar el discutiniu que xeneró tou ello tocantes a la inmoralidá de les inversiones, lo cierto ye que'l gobiernu d'Areces, y anteriores, nunca pescanciaron les estructures empresarial y llaboral que conformen la cultura asturiana como un sector granible en si mesmu, apostrándoles a daqué folclóricu y anecdóticu. Créase otru sector cultural burbuya, el del entretenimientu importáu, al serviciu del turismu. Yera'l so modelu. Un modelu pal pueblu pero ensin el pueblu que pasa percima de too lo que supunxera creación asturiana, artística y industrialmente. Industria del entretenimientu, al serviciu del turismu o de la élite; y non del espectáculu o la cultura como sector granible al serviciu de la población. Nun lloñe de les declaraciones del funcionariu de Facienda.
Nel pasáu Alderique sobre l'Estáu de la rexón (meyor sería falar d'Autonomía o Comunidá), Javier Fernández, col enfotu de amenorgar instituciones y gastos, magar agora Cultura ta na mesma Conseyería qu'Educación, plantega fundir RECREA y la Sociedá Rexonal de Turismu. Esto supon repitir el mesmu esquema de la cultura al serviciu del turismu que tanto dañu fixo al sector de la cultura asturiano y de les artes escéniques en particular. Pa qué camudar nada.
La crisis nun puede ser xustificación pa too. La crisis afecta a toles comunidaes del estáu español. Les Artes Escéniques tán muncho meyor trataes en cualquier comunidá del estáu, con crisis igualmente, que na nuesa; sobren exemplos. Consta qu'hai conciencia del problema ya interés, per parte de l'alministración, n'ameyorar la situación, pero esiste la medrana de que, como siempres, les bones intenciones queden en parches y ocurrencies, ensin dir solucionar la verdadera fonte del problema.
El problema creo que parte d'un conceutu; cultura (y por tanto Artes escéniques) como industria del espectáculu propia, xeneradora de PIB y d'empleos directos ya indirectos, o cultura como entretenimientu importáu al serviciu del turismu.
A partir d'ehí, hai munches midíes que podríen tomase; yo plantegaría –y esto ye discutible o matizable– que RECREA se convierta nuna Axencia d'Industries Culturales a la manera de les qu'hai n'otres comunidaes, con capacidá de diseñar, con calter d'urxencia, amás d'un nuevu y dignu plan d'ayudes, la reforma del circuitu profesional, otros circuitos específicos (como'l d'enseñanza o llingua asturiana), un centru de producción semipúblicu (que podría asitiase na Llaboral) y un centru de documentación. Inclusive les relaciones de la Cultura con otres árees; por exemplu, Turismu.
El sector profesional de les Artes Escéniques en Asturies lleva desque esiste, unos venticinco años, siendo víctima de la aquiescencia de los poderes públicos y de la falta de planificación; por ello l'actividá de cuarenta empreses, y los puestos de trabayu que xenera, directos ya indirectos, son daqué que ta a puntu de desapaecer, lliteralmente. Merezse a lo menos tar al mesmu altor que n'otres comunidaes tocantes a oportunidaes de desenvolvimientu y sofitos; y amás, merez un respetu.
Publicao nel blogue: La cueva'l Guirriu Antón
